Ўзбекистон Республикасининг «Ҳуқуқбузарликлар профилактикаси тўғрисида»

ЯКУНЛОВЧИ ҚОИДАЛАР
46-модда. Ҳуқуқбузарликлар профилактикасини амалга оширишда шахсларнинг ҳуқуқлари, эркинликлари ва қонуний манфаатлари кафолатлари
Ҳуқуқбузарликлар профилактикасини амалга оширишда шахсларнинг ҳуқуқлари, эркинликлари ва қонуний манфаатлари чекланишига, шафқатсиз ёки инсон қадр-қимматини камситувчи муомалада бўлишга, шахсий ҳаёт, ёзишмалар, телефонда сўзлашувлар, почта, телеграф хабарлари ва бошқа хабарлар сир сақланиши, бир жойдан иккинчи жойга эркин кўчиш ва яшаш жойини танлаш, шунингдек шахсий дахлсизлиги, уй-жой дахлсизлиги бузилишига йўл қўйилмайди, бундан қонун ҳужжатларида назарда тутилган ҳоллар мустасно.
Ўзига нисбатан профилактика чора-тадбирлари қўлланилаётган шахслар ҳуқуқбузарликлар профилактикасини бевосита амалга оширувчи органнинг ёки муассасанинг қарорлари, мансабдор шахсларнинг ҳаракатлари (ҳаракатсизлиги) устидан қонун ҳужжатларида назарда тутилган тартибда шикоят қилишга ҳақли.

Ш А Р Ҳ

1. Шахсларнинг ушбу нормада келтирилган ҳуқуқлари, эркинликлари ва қонуний манфаатлари авваламбор, Ўзбекистон Республикасининг Конституцияси ва бошқа қонунлар билан кафолатланган бўлиб, мазкур қонун шахсларнинг ҳуқуқлари, эркинликлари ва қунуний манфааталарининг ҳуқуқбузарликлар профилактикаси соҳасидаги муҳофазасини таъминлайди. Ушбу ҳуқуқлар, эркинликлар ва қунуний манфааталарнинг чекланишига фақатгина Ўзбекистон Республикасининг Жиноят-процессуал (22.09.1994й) ва Жиноят-ижроия кодекслари (25.04.1997й), «Тезкор-қидирув фаолияти тўғрисида»ги (05.05.2014й) каби бир қатор қонун ҳужжатларида белгиланган тартибдагина йўл қўйилиши мумкин.

2. Ўзига нисбатан профилактика чора-тадбирлари қўлланилаётган шахслар Ўзбекистон Республикасининг Конституцияси (08.12.1992й), «Жисмоний ва юридик шахсларнинг мурожаатлари тўғрисида»ги (11.09.2017й), «Электрон ҳукумат тўғрисида»ги (09.12.2015й), «Электрон ҳужжат айланиши тўғрисида»ги (29.04.2004й), «Электрон рақамли имзо тўғрисида»ги (11.12.2003й), «Давлат ҳокимияти ва бошқарув органлари фаолиятининг очиқлиги тўғрисида»ги (05.05.2014й) каби қонунларда белгиланган шакл, усул ва тартибда ҳуқуқбузарликлар профилактикасини бевосита амалга оширувчи органнинг ёки муассасанинг қарорлари, мансабдор шахсларнинг ҳаракатлари (ҳаракатсизлиги) устидан шикоят қилишга ҳақли саналадилар.