Ўзбекистон Республикасининг «Ҳуқуқбузарликлар профилактикаси тўғрисида»

45-модда. Ҳуқуқбузарликлардан жабрланувчиларга ёрдам кўрсатувчи ихтисослаштирилган муассасалар
Давлат органлари ва нодавлат нотижорат ташкилотлари қонун ҳужжатларига мувофиқ ҳуқуқбузарликлардан жабрланувчиларга ёрдам кўрсатувчи ихтисослаштирилган муассасалар тузиши мумкин. Ихтисослаштирилган муассасалар ҳуқуқбузарликлардан жабрланувчиларга ҳуқуқий, ижтимоий, психологик, тиббий, педагогик ва бошқа турдаги ёрдам кўрсатади.
Ҳуқуқбузарликлардан жабрланувчиларга ёрдам кўрсатувчи ихтисослаштирилган муассасаларни тузиш ва уларнинг ишини ташкил этиш тартиби қонун ҳужжатларида белгиланади.

Ш А Р Ҳ

1. Давлат органлари ва нодавлат нотижорат ташкилотлари амалдаги қонун ҳужжатларига кўра ҳуқуқбузарликлардан жабрланувчиларга ёрдам кўрсатувчи ихтисослаштирилган муассасалар тузиши мумкин.

Ҳуқуқбузарликлардан жабрланувчиларга ёрдам кўрсатувчи ихтисослаштирилган муассасалар давлат органлари ва нодавлат нотижорат ташкилотлари ҳузурида ташкил этилиб, мазкур давлат органлари ва нодавлат нотижорат ташкилотларнинг муайян функциясини бажаришга йўналтирилади. Айнан шунинг учун ҳам улар ихтисослаштирилган муассаса мақомига эгадирлар.
Ҳуқуқбузарликлардан жабрланувчиларга ёрдам кўрсатишга ихтисослаштирилган ушбу муассасалар асосан ҳуқуқий, ижтимоий, психологик, тиббий, педагогик ва бошқа турдаги ёрдам кўрсатишга йўналтирилади. Бундай муассасаларга Ўзбекистон Республикаси Вазирлар Маҳкамасининг 2008 йил 5 ноябрда қабул қилган «Одам савдоси жабрдийдаларига ёрдам бериш ва уларни ҳимоя қилиш бўйича Республика реабилитация марказини ташкил этиш тўғрисида»ги 240-сонли қарори билан Ўзбекистон Республикаси Меҳнат ва аҳолини ижтимоий муҳофаза қилиш вазирлиги (Ҳозирги кунда ушбу вазирлик Ўзбекистон Республикаси Бандлик ва меҳнат муносабатлари вазирлиги деб номланган) ҳузурида ташкил этилган Республика реабилитация марказини мисол қилиб келтириб ўтиш мумкин.
Одам савдосидан жабрланганларни ижтимоий реабилитация қилиш, уларни нормал турмуш тарзига қайтариш мақсадида амалга оширилади ва мазкур шахсларга юридик ёрдам бериш, уларни психологик, тиббий, касбий реабилитация қилиш, уларни ишга жойлаштириш, уларга вақтинчалик турар жой беришни ўз ичига олади.
Одам савдосидан жабрланганларни ижтимоий реабилитация қилиш Ўзбекистон Республикасининг Давлат бюджети маблағлари ва қонун ҳужжатларида ман қилинмаган бошқа манбалар ҳисобидан амалга оширилади.
2. Ҳуқуқбузарликлардан жабрланувчиларга ёрдам кўрсатувчи ихтисослаштирилган муассасаларни тузиш ва уларнинг ишини ташкил этиш тартиби қонун ҳужжатларига мувофиқ амалга оширилади.
Давлат органлари ҳузурида ташкил этиладиган Ҳуқуқбузарликлардан жабрланувчиларга ёрдам кўрсатувчи ихтисослаштирилган муассасалар 1993 йил 6 майда қабул қилинган «Ўзбекистон Республикаси Вазирлар Маҳкамаси тўғрисида»ги Ўзбекистон Республикаси Қонунининг «Вазирлар Маҳкамасининг иқтисодий ва ижтимоий-маданий ривожлантириш соҳасидаги асосий ваколатлари» номли 5-моддасига кўра Вазирлар Маҳкамаси томонидан тузилиши ва уларнинг иши ташкил этилиши мумкин.
Нодавлат нотижорат ташкилотлари эса Ўзбекистон Республикасининг 1999 йил 14 апрель куни қабул қилинган «Нодавлат нотижорат ташкилотлари тўғрисида»ги қонунининг «Нодавлат нотижорат ташкилотининг ҳуқуқлари» номли 7-моддасида нодавлат нотижорат ташкилотлари «уставда белгиланган вазифаларни бажариш учун тадбиркорлик тузилмаларини ташкил этиш» ҳуқуқидан фойдаланган ҳолда ҳуқуқбузарликлардан жабрланувчиларга ёрдам кўрсатувчи ихтисослаштирилган муассасаларни тузади ва уларнинг фаолиятини ташкил этади.
7-БОБ