Ўзбекистон Республикасини янада ривожлантириш бўйича Ҳаракатлар стратегияси тўғрисида

Тарафларнинг шартномадан келиб чиққан мажбуриятлари мажбурият шартларига ва қонун ҳужжатлари талабларига мувофиқ лозим даражада бажарилиши керак.


Низонинг моҳияти:
2015 йил 20 мартда масъулияти чекланган жамияти (бундан буён матнда даъвогар деб юритилади) ва фермер хўжалиги (бундан буён матнда жавобгар деб юритилади) ўртасида 18-сонли контракт тузилган ва унга кўра даъвогар (етказиб берувчи) чет эл давлатидан 60 бош “сименталь” зотли қорамоллар (бундан буён матнда маҳсулот деб юритилади)ни жавобгар (сотиб олувчи)га етказиб бериш, жавобгар эса маҳсулотни қабул қилиб олиш ва ҳақини тўлаш мажбуриятини олган.
Контрактнинг 2.1-бандида бир бош қорамолнинг баҳоси 2 484 Еврони, шартноманинг баҳоси 149 040 Еврони ташкил қилиши, тўловлар Евронинг сўмдаги эквивалентида сўмда амалга оширилиши, 2.1.2-бандида шартнома асосида “етказиб берувчи”нинг ҳисоб-рақамига келиб тушган пул маблағлари белгиланган тартибда конвертацияни амалга ошириш учун депонентланиши, 2.1.3-бандида эса маҳсулот “сотиб олувчи”га тўлиқ етказиб берилган ва пул маблағлари конвертация қилинганидан кейин тарафлар ўртасида якуний молиявий ҳисоб-китоб конвертация қилинган кун ҳолатида амалга оширилиши белгиланган.
Жавобгар томонидан даъвогарга 2015 йилнинг март-май ойларида жами 402 408 000 сўм тўлаб берилган.
2015 йил 20 май куни даъвогар жавобгарга контракта назарда тутилган маҳсулотни етказиб берган.
Даъвогар томонидан жавобгардан келиб тушган пул маблағларини конвертациялаш учун банкка 2015 йил 3 июнда буюртма берилган ва 2017 йил 30 апрель куни 1 Евро 4 085,60 сўм эквивалентида 149 040 Евро конвертация қилинган. Ўзбекистон Республикаси Марказий банкининг ўша кундаги курси бўйича бу хорижий валюта суммасининг миллий валютадаги эквиваленти 608 917 824 сўмни ташкил қилган. Натижада, жавобгар томонидан тўланган сумма ва хорижий валютани сотиб олиш учун тўланган миллий валюта суммасининг фарқи 206 509 824 (608 917 824 – 402 408 000) сўмни ташкил қилган.
Ушбу фарқ суммасини тўлаб бериш учун даъвогар жавобгарга 2017 йил 1 май куни мурожаат қилган. Аммо даъвогарнинг мурожати оқибатсиз қолдирганлиги сабабли даъвогар судга даъво аризаси билан мурожаат қилиб, жавобгардан 206 509 824 сўм асосий қарз ундиришни сўраган.