Ўзбекистон республикаси олий ва ўрта махсус таълим вазирлиги қарши давлат университети

2. Объектнинг шаклига хос белги хусусиятлар асосида номланиши. Ном ижодкорлари бўлган аҳолининг кузатувчанлик хусусиятлари орографик объектларнинг турли шаклига хос белгиларини назардан четда қолдирмаган. Бундай объектларни номлашда улар ўзларининг турмуш тарзи, урф-одатлари, касб-корларига боғлиқ тушунчаларни ифодалайдиган сўзлардан фойдаланишган. Улар орографик объектларнинг шаклий хусусиятларини ўзларига хос ва мос бўлган нарса-предмет, ҳайвонлар ва инсонинг ўзига тегишли бўлган тана аъзоларига ўхшатиш асосида номлаганлар. Ўтказилган таҳлилларнинг кўрсатишича, оронимларнинг таркибида ўхшатиш билан боғлиқ қуйидаги шакл тушунчаларини ифодалайдиган сўзлар иштирок этар экан: бешик: Бешиктепа (До., тепа), дастор (салла): Дастортош (Чр., До., баландлик), думалоқ: Думалоқхорра (Қм., баландлик), Дўммоқ (Шс., баландлик), дўғир (ғадир-будир): Дўғиртош (Дн., баландлик), зингир (тож. эгар): Зингирак (Шс., чўққи), киндик: Киндиктепа (Чр., тепа), лўнда: Лўндасанг (Шс., жой), одам: Одамтош (До., чўққи), айлана: Айланатумшуқ (Кт., баландлик), тумшуқ:Тумшуқтоғ (Бс., тоғ), хумдон: Хумдонак (Бс., баландлик), шох: Шокалон (Шс., адир), Шокалон (Бс. тизма), ялпоқ: Ялпоқтепа (Ғз., тепа), ўтов: Ўтовтош (До., адир), това: Тобатош (Бс., баландлик); эгри: Эгрижар (жар); иймак (ярим доира шаклида эгилган, бурилган): Иймакжар (Чр., яйлов); эмчак
(кўкрак): Қизилэмчак (Шс., чўққи), Туятош (Шс., жой), Туясингир (Чр., баландлик), Келинтош (До., баландлик) ва б.
3. Объектнинг ҳажм-ўлчов белгиси асосида номланиши. Орографик объектларнинг номланишида уларнинг ҳажми ва ўлчамига хос белгилар ҳам катта аҳамият касб этади. Бунда номлар таркибида бевосита ҳажм-ўлчовни ифодаловчи катта, кичик, бой , калон (катта), хурд (кичик), узун, калта, тор, танг каби сўзлар кенг қўлланади. Улар номларнинг биринчи - аниқловчи компоненти бўлиб келиб, белгини дифференциаллаб кўрсатиш вазифасини бажаради. Ўтказилган таҳлиллар бу гуруҳга кирувчи қуйидаги оронимлар мавжудлигини кўрсатди: катта: Каттадапсан (Чр., тепа), Каттазов (Чр., дара), Каттатахта (До., баландлик); кичик: Кичикдапсан (Чр., тепа), Кичикховар (Чр., яйлов), Кичикчамбар (Кс., баландлик), Кичикқовоқ (До., баландлик); танг (тож. тор): Тангсор (До., адир); тор: Торқапчиғай (До., дара); калон (тож. катта): Ҳамикалон (Шс., баландлик); хурд (тож. кичик): Хурсантоғ – аслида Хурдсангтоғ (Со., чўққи); узун: Узунширам (До., баландлик), Узунмўла (Қш, жой), Узунқир (Чр., қир), Узунқир (Шс., баландлик); ғайбар (катта, улкан): Ғайбартош (До., адир); ҳазор (аслида азар – баланд): Ҳазартепа (Кс., тепа); бой (катта, баланд): Бойдўнг (Чр., тепа), гов (тож. чуқур): Говдара (Қм., дара), Говдаҳна (Қм., дара) ва б.