Ўзбекистон Республикаси Халқ таълими вазирлигининг 2011 йил

Қорақалпоғистон Республикаси Халқ таълими вазирлиги, Тошкент шаҳри ва вилоятлар Халқ таълими бошқармалари ҳузуридаги узлуксиз методик хизматни мувофиқлаштириш кенгаши тўғрисида

НИЗОМ

Ушбу Низом Ўзбекистон Республикасининг “Таълим тўғрисида”ги қонуни ва “Кадрлар тайёрлаш миллий дастури” асосида вилоят халқ таълими тизимида амалга оширилаётган узлуксиз методик хизмат жараёнини, таҳлилий ишларни амалга ошириш, ривожлантиришга оид чора-тадбирлар ишлаб чиқиш ва бажарилишини назорат қилиш, таълим муассасалари раҳбарлари ва педагогларнинг касбий маҳоратини ошириш ишларини мувофиқлаштириш тартибини белгилайди.

I. Умумий қоидалар

1. Худуддаги узлуксиз методик хизматни ташкил этиш, унинг йўналишларини белгилаш, таълим тизимида амалга оширилаётган методик хизматни мувофиқлаштириш, ДТС талаблари асосида таълим самарадорлигини ошириш борасида олиб борилаётган ишларни таҳлил қилиш, мавжуд муаммоларни ҳал этиш юзасидан чора-тадбирларни белгилаш ва назорат қилиш каби жараённи бошқариш мақсадида Қорақалпоғистон Республикаси Халқ таълими вазирлиги, Тошкент шаҳри ва вилоятлар Халқ таълими бошқармалари ҳузуридаги мувофиқлаштириш кенгаши (кейинги ўринларда Кенгаш) ташкил этилади.

2. 
   Кенгаш ўз фаолиятини Ўзбекистон Республикаси Конституцияси ва қонунлари, Ўзбекистон Республикаси Президентининг қарор, фармон ва фармойишлари, Ўзбекистон Республикаси Вазирлар Маҳкамасининг қарорлари, Халқ таълими вазирлигининг қарор ва буйруқлари ҳамда мазкур Низомга амал қилган ҳолда юритади.
   
3. 
   Кенгаш халқ таълими бошқармаси қошида ташкил этилиб, бошқарма бошлиғи раис, вилоят педагогларни қайта тайёрлаш ва малакасини ошириш институтининг ректори ҳамраислик қилади.
   
4. 
   Кенгашга масалалар тайёрлаш, вилоятдаги узлуксиз методик хизматнинг амалга оширилишини таҳлил қилиш ва мониторингини олиб бориш учун Халқ таълими бошқармасининг Методика маркази (ходимлари орасидан) штатидан масъул котиб белгиланади.