Ўзбекистон республикаси адлия вазирлиги тошкент давлат юридик институти шорахметов шоакбар шорустамович

173-м о д д а. Ишда иштирок этувчи шахсларнинг
илтимосномалари суд томонидан
ҳал қилиниши


Ишда иштирок этувчи шахсларнинг янги далилларни талаб қилиб олиш тўғрисидаги ва ишни кўриш билан боғлиқ бошқа барча масалалар бўйича илтимосномалари ишда ишти­рок этувчи бошқа шахсларнинг фикр-мулоҳазалари тинглан­ганидан кейин суднинг ажрими билан ҳал қилинади.

Ишда иштирок этувчи шахсларга тақдим этиладиган асосий процессуал ҳуқуқлардан бири - бу ишга тааллуқли бўлган илти­мосномалар билан судга мурожаат қилиш ҳуқуқидир. Илтимоснома маълум процессуал ҳаракатларни содир қилиш ҳақидаги илтимос­дан иборат бўлиб, бундай ҳаракатлар мурожаат қилувчининг фик­рича, ишни тўғри ҳал қилиш ёхуд унинг ҳуқуқларига амал қили­нишини таъминлаш: мисол учун, ёзма далилларни тўплашга кўмак­лашиш, экспертиза тайинлаш, ишда қатнашиш учун иштирокчилар, учинчи шахсларни жалб қилиш, қўшимча гувоҳларни сўроқ қилиш, ишнинг кўриб чиқилишини кейинга қолдириш ва ҳоказолар учун зарур бўлади.

Иш учун зарур бўлган далилларни кейинчалик тақдим этиш мумкин бўлмай қолади ёки қийинлашади дейишга асоси бўлган шахслар судга далилларни таъминлаш тўғрисидаги ариза бериш ҳуқуқига эга. Ушбу ариза далилларни таъминлаш билан боғлиқ процессуал ҳаракатлар амалга оширилиши керак бўлган ҳудудда фаолият олиб бораётган судга берилади. Аризада таъминланиши зарур бўлган далиллар, далилларнинг таъминлаш тўғрисидаги аризачининг илтимоси билан мурожаат қилишга ундаган сабаблар, шунингдек таъминланадиган далиллар зарур бўлган ёки кейинча­лик керак бўлиб қолиши мумкин бўлган иш кўрсатилиши керак.
Суд ишда иштирок этувчи шахсларнинг янги далиллар талаб қилиб олиш ҳамда ишнинг кўрилиши билан боғлиқ бўлган барча бошқа масалалар бўйича илтимосларини ҳал қилишга киришади. Илтимосномаларнинг мазмуни суд мажлиси баённомасида баён қилинади. Илтимосномада ифода этилган илтимос асослантирилган бўлмоғи даркор. Илтимосномаларнинг асослилиги ҳамда кўрилаёт­ган ишга тааллуқлилиги масаласи юзасидан ишда қатнашаётган шахсларнинг фикри тингланганидан сўнг суд илтимосни қаноат­лантириш ёки уни рад қилиш тўғрисида ажрим чиқаради. Суднинг бу ажрими дарҳол суд мажлисида эшиттирилади.