Ўзбекистон республикаси адлия вазирлиги тошкент давлат юридик институти шорахметов шоакбар шорустамович

348⁹-м о д д а. Ишни шикоят (протест) билан бирга
олгандан сўнг кассация инстанцияси
судининг ҳаракатлари


Кассация инстанцияси суди зарур ҳолларда:
1) ишда иштирок этувчи шахсларга шикоят ёки протест юзасидан тушунтириш беришни (эътироз билдиришни) таклиф қилади. Тушунтиришларнинг (эътирозларнинг), шунингдек уларга илова қилинган ҳужжатларнинг нусхаларини суд ишда иштирок этувчи шахсларга топширади;
2) ишда иштирок этувчи шахсларнинг илтимосномаси бўйича далилларни талаб қилиб олишга кўмаклашади.


1. Кассация инстанцияси суди иш кўрган биринчи инстанция судидан шикоят (протест) билан бирга фуқаролик ишини олгандан кейин бир қатор процессуал ҳаракатларни амалга оширади.
Фуқаролик ишини кассация судида мазмунан кўргунга қадар ишда иштирок этувчи шахслардан шикоят, (протест) юзасидан тушунтириш (эътироз) билдиришга ҳақли эканлиги тўғрисида қан­дай фикрларга эга эканлигини аниқлаш лозим. Агар ишда иштирок этувчи шахслардан бирортаси, масалан, прокурор берилган ши­коятга ўзининг эътирозини билдирган ҳолларда суд бошқа ҳужжат­лар билан бир қаторда эътирозни ҳам ишда иштирок этувчи бошқа шахсларга таништиради.
2. Қонун кассация инстанцияси судига иш кўришга оид айрим процессуал ҳаракатларни амалга ошириш вазифасини юклайди. Бундай процессуал ҳаракатлардан бири ишда иштирок этувчи шахсларнинг илтимосномаси бўйича далилларни талаб қилишга кўмаклашишдир. Бу тўғрида ФПКнинг 57-моддасида белгиланган қоидалар юқори судлар, жумладан кассация инстанцияси суди учун ҳам аҳамиятлидир.
Ушбу қоидага кўра, ҳар бир тараф ўзининг талаблари ва эътирозларига асос қилиб кўрсатган ҳолатларни исботлаши шарт.
Суд қандай ҳолатлар иш учун аҳамиятга эга эканлигини, улар­ни тарафлардан қайси бири исботлаши кераклигини аниқлайди, ҳатто тарафлар бу ҳолатларни далил қилиб келтирмаган бўлсалар ҳам, уларни муҳокамага қўяди.
Далиллар тарафлар ва ишда иштирок этувчи бошқа шахслар томонидан тақдим этилади. Суд уларга қўшимча далиллар тақдим қилишни таклиф этиши мумкин. Агар қўшимча далиллар тақдим этиш тарафлар ва ишда иштирок этувчи бошқа шахслар учун қийинчилик туғдирса, суд уларнинг илтимосномасига кўра, далил­лар тўплашда уларга ёрдам кўрсатади.