ЎҚув адабиёти овқатланиш

Энтеротоксиген E. Coli. Энтеротоксиген ичак таёқчалари – ушбу бактерияларнинг тўртта серологик турларидан бири бўлиб, асосий касаллик белгиси ич кетиши (диарея) бўлган гастроэнтеритни келтириб чиқаради. Бу касаллик биринчи навбатда ривожланаётган мамлакатлар аҳолиси, айниқса, кичик ёшдаги болалар ва ушбу мамлакатларга ташриф буюрувчи сайёҳлар орасида учрайди (“сайёҳлар диареяси”). Энтеротоксиген ичак таёқчаларининг манбалари одамлар (ташувчилар) ва ҳайвонлардир.
Энтеротоксиген ичак таёқчаларининг инфекция юқтирувчи дозаси миллионлаб микроб ҳужайраларини ташкил этади (болаларда доза анча камроқ бўлади). Организмга алиментар йўл билан тушган ичак таёқчалари ингичка ичакда жойлашиб олишади ва ичак бўшлиғидаги суюқлик секрециясини фаоллаштирувчи токсин ишлаб чиқара бошлашади. Бунда диарея 24 соатгача давом этиши мумкин. Бошқа касаллик белгилари қуйидагилар бўлиши мумкин: абдоминал санчиқлар, кўнгил айниши, субфебрил безгак. Касалликнинг яширин (инкубацион) даври 6 ... 12 соатни ташкил этади. Болалар ва қарияларда узоқ вақт ич кетганида электролитларнинг ўрнини тўлдириш зарур бўлишини ҳисобга олмаганда, касаллик тез, қарийб асоратларсиз ўтиб кетади.
Ташҳисловчи текширувлар учун мураккаб лаборатория тадқиқотлари – иммун-кимёвий, цитологик, ПЦР, токсикологик текширувлар ёрдамида ичак ажратмаларидаги қўзғотувчини аниқлаш зарур бўлади. Вазифа шу билан мураккаблашадики, касалликнинг ўткир даврида энтеротоксиген ичак таёқчаларининг кўпчилиги ичак ичидагилар билан бирга чиқиб кетади. Озиқ- овқатлардаги ичак таёқчалари ва токсинларни аниқлаш ҳам худди шундай йўл билан амалга оширилади. Бактериялар ва уларнинг токсинларини ажратиб олиш ва аниқлашнинг умумий вақти уч кунга боради.
Энтеротоксиген ичак таёқчалари билан кўпроқ овқат тайёрлашда фойдаланиладиган ичимлик суви, сут маҳсулотлари ва иссиқлик ишлови берилмайдиган таомлар (айтайлик, салатлар) ифлосланади. Энтеротоксиген ичак таёқчаларининг ичимлик суви ва овқатларга тушиши оддий санитария меъёрлари ва шахсий гигиена кўникмалари бузилишига олиб келади. Санитария-эпидемиология назорати тизими ишлайдиган мамлакатларда ушбу турдаги ичак таёқчалари билан боғлиқ бўлган коли-инфекция ҳолатлари қарийб учрамайди.