Умурзоқов, А. Тошбоев

Чигит экиш. Чигитни экишдан олдин 5-6 кун офтобга ёйиб қиздирилади. Касаллик ва зараркунандаларга қарши дориланади. Бунда «фентиурам» препаратидан фойдаланилади. Тукли чигитни экиш олдидан намланади. Бунинг учун 1 т чигитга биринчи намланганда 300 л, кейинги икиинчи ва учинчи намлашларда эса 600 л дан сув сарфланади. Экишнинг дастлабки даврларида 12 соат, кейинчалик эса 18 соатгача намланади. Туксизлантирилган чигитлар қуруқлигича экилади.
Тезда ва бир текис кўчат ундириб олиш учун «мивал» биостимулятори ишлатилади. Бунда 5 л сувга 1 г препарат қўшиш кифоя. Туксизлантирилган чигитнинг 1 тоннасига 30-40 л, тукли чигит учун эса 500-600 л сув сарфланади.
Чигитни экиш вақтида тупроқда етарли намлик бўлиши, ҳарорат эса 120 С⁰ дан паст бўлмаслиги лозим. Бундай муддат жанубий вилоятларда 20-25 март, марказий вилоятларда 5-10 апрел ва шимолий вилоятларда 20-25 апрелга тўғри келади.
Энг аввало тукли, кейин эса туксиз чигитларни экиш тавсия қилинади.
Пахта, асосан, икки хил усулда, қатор ораси 60 ва 90 см кенгликда экилади. Уларга белгиланган миқдорда чигит ташланади.
Чигит экиш миқдори туксизлантирилган бўлса, ҳар гектарга 25-30 кг, тукли бўлса 60- 70 кг белгиланади.
Чигитнинг экиш чуқурлиги 4-6 см бўлиши кифоядир.
Ягана қилингандан кейин ҳар гектарга ўрта толали пахта навларидан 110-170 минг туп кўчат қолдирилади. Ғўза 1-2 чин барг чиқаргунга қадар яганани тугаллаш лозим.
Ғўза парвариши. Агар чигит экилгандан кейин қатқалоқ пайдо бўлса, уни йўқотиш учун тишли бороналар юргазилади. Ниҳоллар униб қолган бўлса, МВХ-5, 4 ва МВ-2,8 маркали мотига ёки РОР ва УРОР ротация юлдузчали культиваторлар ишлатилади. Юмшатиш чуқурлиги 3-5 см бўлиши кифоя.
Ғўзанинг ўсиш даврида унинг қатор оралари юмшатиб турилади. Биринчи культивация юзароқ ўтказилади. Ишчи органларининг ўрнатиш чуқурлиги четкиларида 6-8 см, ўртасида эса 10-12 смни ташкил қилади. Бунда ҳимоя зонаси 10-12 смдан ортиқ бўлмаслиги керак. Кейинги культивациялар бир оз чуқурлатиб борилади. Масалан, қатор ораси 60 см экилган ғўзаларни четки ишчи органлари 8-10 см, ўртадагиси 12-14 см, қатор ораси 90 см бўлганда эса 8-10 см ва 14-16 см чуқурликда ўтказилади. Пахта бутун вегетация даврида 4-7 марта культивация қилинади. Далаларда ишлов сонини камайтириш мақсадида культивация билан бир вақтда ўғитлаш, суғориш учун эгат очиш, механизация ёрдамида чеканка қилиш ва бошқа ишлар бир йўла қўшиб бажарилади. Эгатларнинг чуқурлиги эса 15- 22 см бўлиши лозим.