Ulıwma orta bilim beriw mektepleriniń 7-klası ushın sabaqlıq

9. Qızıl menen berilgen sózler qanday máni bildiredi?
10. Qaharmannıń esitken dawısı neniń dawısı eken?
Qamshı menen jılandı sabalay basladım. Jılan qamshıǵa shıdamay, qoyandı 
jazdırıp jiberdi de, iyreńlep, shóptiń arasına jılp etip kirip ketti. Qoyan bolsa, 
qorqqanınan ornınan qozǵala almay, bir orında qatıp qalǵan edi. Oǵan rehimim keldi. 
Abaylap, qushaǵıma aldım. Jumsaq júnlerin sıypap, erkelettim.
Jol boyı onı álpeshlep, sılap-sıypap, úydegilerge bul tańqalarlıq waqıyanı aytıp 
beriwdi qálep keler edim.
Bul shınnan da hayran qalarlıq jaǵday edi. Onı jılannıń jutıp jiberiwine sál 
qaldı. Men bolsam, onı qorqınıshlı ólimnen qutqarıp qaldım. Qoyannıń náreste kibi 
shırqıraǵanına hayran bolıp, Grozniyǵa jetip keldim.
11. Tirkewishli kelgen sózler gáplerde qaysı aǵzanıń xızmetin atqarıp 
kelgen?
12. Qaharmanımız qanday qaharmanlıq is kórsetti?

---

217
Pochtada meni hár saparǵıday, arqa táreptegi bólmege ót dedi. Salıqtan 
jıynalǵan aqshalar bul jerde jáne bir márte qaytadan sanalar edi. Pochtashı 
ekewimiz uzaq otırıp, pul sanadıq. Xızmetker hayal, ádettegishe, men sanaǵan pul 
qatlamların asıqpastan qabıl etip alar edi. Bir waqıtta tosattan bólmeni basına 
kóterip qıshqırıp jiberse bola ma! Ol tutqalaq tutqanday qaltırar, pullar bolsa ján-
jaqta shashılıp jatqan edi. Men de shorshıp kettim. Ornımnan turıp, sol tárepke 
qaradım da, waqıyanıń tórkinin túsindim. Meniń sol qutqarǵan qoyanım jerde 
tapjılmay turar edi. Qoynımnan qalay etip sıpırılıp túskenin sezbey qalıppan. Aqsha 
sanap otırıp, onıń sekirip túskenin bayqamaǵanman. Ol bolsa, órmelep barıp, qarsı 
aldımda otırǵan orıs hayalınıń ayaǵına jabısqan eken. Bárshe qaǵaz pullar jerge 
tóselip jatar edi. Qoyandı uslap aldım da, pullardı jıynastırıp, qayta sanay basladım. 
Biraq kásiples hayaldıń qolları qalshıldap tınbas, awzına kelgenin qaytarmay aytıp, 
meni ǵarǵar edi:
– Bul ne degen gáp! Adam bolmay, qara jerge kirip ket! Oynap júrgen bul 
balaǵa qanday qılıp sonsha puldı isenip tapsırıp qoyıptı, aqılıńa uǵras kelmeydi! 
Bul aqmaq bala bolsa, qoyan quwalaw menen áwere!