Ulıwma orta bilim beriw mektepleriniń 7-klası ushın sabaqlıq

atawısh yamasa feyil bayanlawısh ekenligin aytıń. 
Bir saparı kórkemlik keńeske men tárepimnen usınılǵan «Sen báhárdi 
saǵınbadıń ba?» degen atamadaǵı saz-sáwbetli kompoziciya tuwralı biraz 
tartısıwlar boldı. Birewler ataması nadurıs tańlanǵan, «Sen báhárdi saǵınbadıń ba?» dep 
aytpaydı. Kórsetiwdiń atın ózgertiw kerek degen pikirlerdi ayttı. Kópshilik pikirlerin 
bildirip bolǵannan keyin maǵan sóz berildi. 
Ózbekstan televideniesi hám radiosında usı atamadaǵı qosıqtıń turaqlı aytılıp 
kiyatırǵanlıǵın, sózi de, naması da xalıq kewlinen shıǵatuǵınlıǵın ortaǵa qoydım. 
Kúni keshe Qaraqalpaqstan xalıq shayırı Tolıbay Qabulovqa barıp, onıń menen 
birqansha pikirlesip, náwbáhárge arnap arnawlı kompoziciya tayarlap atırǵanımızdı, 
usı kórsetiw ushın «Sen báhárdi saǵınbadıń ba?» atamasında qosıq jazıp beriwdi 
ótinish etkenimdi ayttım. Ol meniń pikirimdi qollap quwaplap, qattı quwanıp qaldı. 
«Televidenie jurnalistleri kóp jerge baradı, kóp nárselerdi kóredi, ǵaja-ǵaj ómirdiń, 
qaynaǵan miynettiń arasında júredi. Sonlıqtan olar jaqsı kórsetiwler tayarlaw, jaqsı 
nárselerdi islew múmkinshiligine iye. Al, óziń bolsań, biz shayırlarǵa jaqsı ideyalar 
berip, júreklerge qozǵaw salıp, jańa qosıqlar jazıwǵa ilham berip keteseń. Kelgenińe 
raxmet. Erteń qosıqtı jazıp jetkeremen» dep onıń menen sáwbetleskenimdi ortaǵa 
tóktim.
Usınnan soń hámme jım-jırt bolıp qaldı. Kelesi háptede kompoziciya sol 
waqıtları televidenieniń bas rejissyorı bolıp islep atırǵan Tóreniyaz Qálimbetovtıń 
rejissyorlıǵında tayarlanıp efirge jiberildi. Tolıbay Qabulovtıń bul qosıǵınıń hárbir 
qatarında onıń basqa qosıqlarınday janǵa jaǵımlı nama ırǵaqları tógilip turar edi. 
Men kóp uzamay qosıqtı Qaraqalpaqstan teleradiokompaniyası janındaǵı 
orkestr basshısı Sharapatdin Paxratdinovqa alıp barıp berip, onnan qosıqqa nama 
jazıwdı ótinish ettim. Kompozitorǵa da jańa qosıq tabılmay atırsa kerek. Ol qattı 
quwanıp ketti. Eń quwanıshlısı, usı jılı Nawrız bayramında qosıq Ózbekstanǵa xızmet 
kórsetken, Qaraqalpaqstan xalıq artisti Bazargúl Karimovanıń atqarıwında xalqımızǵa 
sawǵa etildi.
 (Qıyatbay Mádreyimovtıń «Qálbim súygen kásip» kitabınan)