Tuproqshunoslik va geografiya

NAVBAHOR. Tuman markazidan 14,1 km shimoli-sharqda, Denav qishloq fuqarolar yig’ini hududida joylashgan. «Navbahor» — yangidan tashkil etilgan qishloqlar sirasiga kiradi. Uning hududida Quyi ko’cha yoki G’ulomon degan qadimiy qishloq bo’lgan.
G’ulomon — tojikcha: «qullar» degani. Qulchilik tuzumi tugatilgach, ozodlikka chiqqan bir qancha qul shu erni makon tutgan. Mashhur yozuvchi, S.Ayniyning bolalik yillari G’ulomon qishlog’i yaqinidagi Mahallaibolo qishlog’ida o’tgan. Uning «Qullar» romanidagi ko’pgina voqealar xuddi ana shu G’ulomon qishlog’i odamlari hayotidan olib yozilgan. 1968 yilda G’ulomon qishlog’i nomi o’zgartirildi. G’ulomon qishlogi yangi qishloq tarkibiga qo’shilib ketib, yagona nom bilan yuritila boshlandi. Respublikamiz Mustaqlllikka erishgach, qishloq «Navbahor» deb nomlandi.
PAXTAOBOD. Tuman markazidan 5 km shimolda, Tezguzar qishloq fuqarolar yig’ini hududida joylashgan. Paxtaobod — yangi qishloqlardan, 30-yillarda tashkil etilgan. Aholisining asosiy qismi Qarshi tomonlardan ko’chib kelgan.
YANGIOBOD. Yangiobod tuman markazidan 13 km shimoli-g’arbda, Vardonze qishloq fuqarolar yig’ini hududida joylashgan. Qo’shni qishloqlar singari 20-yillarda kimsasiz cho’lda, janubiy qishloqlardan odamlarning ko’chib kelishi tufayli paydo bo’lgan. Aholisi asosan dehqonchilik va chorvachilik bilan shug’ullanadi.
YANGIOBOD-2. Tuman markazidan 20 km shimoli-sharqda, Denav qishloq fuqarolar yig’ini hududida joylashgan. Qishloq erlarning o’zlashtirilishi munosabati bilan 1973 yilda paydo bo’lgan. Shuning uchun unga «Yangiobod» deb nom berilgan. Axolini atrofdagi turli qishloqlardan ko’chib kelgan.
YANGIQISHLOQ. Tuman markazidan 15 km g’arbda, Vardonze qishloq fuqarolar yig’ini hududida joylashgan. Yangiqishloqda 20-yillardan e’tiboran yangi erlar o’zlashtirila boshlangach, odamlar ko’chib kela boshlagan.
HOVLINAV. Tuman markazidan 9 km g’arbda, Jo’ynav qishloq fuqarolar yig’ini hududida joylashgan. Qishloq aholisi asli Mo’g’ulon qishlog’idan (Vardonze yaqinida) bo’lgan. Tabiiy ofat — qum bosgandan so’ng (150—170 yil oldin) mo’g’ulonliklar Qumbosti, Dodbog’ni va boshqa qishloqlarga, shuningdek, hozirgi «Hovlinav» qishlog’iga ko’chib o’tganlar. «Hovlinav» — tojikcha: «yangi uy yangi hovli, yangi: qishloq» ma’nolarini beradi.