Tuproqshunoslik va geografiya

Bitiruv malakaviy ishining hajmi va strukturasi. BMI kirish, ikkita bob, xulosa va foydalanilgan adabiyotlar ro’yxatidan iborat. Ishning mazmun va mohiyatini ochib berish uchun 5 jadval, 3 ta chizma, 2 ta sxematik kartalardan foydalanilgan.

Bitiruv malakaviy ishining birinchi bobi “Surxondaryo viloyatining umumgeografik tavsifi” deb ataladi. Unda hududning tabiiy-geografik tavsifi, ya’ni geografik o’rni, relyefi, geologik tuzilishi va foydali qazilmalari, iqlimiy sharoiti va organik dunyosi tahlil qilingan. Ikkinchi bobda Surxondaryo viloyatining ichki suvlariga batafsil ma’lumot berib o’tilgan. Ulardan samarali va oqilona foydalanish chora tadbirlari ishlab chiqilgan. Shuningdek daryolarga inson faoliyati ta’siri berilgan bo’lib, sug’orma dehqonchilikning rivojlanishi bilan yangi yerlarning o’zlashtirilishi, kanallar, ariqlar, suv omborlarining qurilishi va boshqa gidrotexnik, gidromeliorativ ishlarning amalga oshirilishlari yoritilgan. Surxondaryo suvidan hozirgi foydalanish holati, suvdan oqilona foydalanish va muhofaza qilish, sug’orishda ilg’or texnologiyalarni keng joriy qilish, tog’ soylarida kichik suv omborlarini qurish, tog’ oldi tekisliklarida tomchilatib sug’orishdan keng foydalanish masalalari taklif sifatida aytib o’tildi.

Albatta ish kamchiliklardan xoli emas, kelgusida men ushbu ishni davom ettirib magistirlik dissertatsiyasi mavzusi sifatida yanada kengroq yoritmoqchiman. Pedagogik va ilmiy faoliyatimni kafedramiz professor-o’qituvchilari bilan hamkorlikni uzmagan holda olib bormoqchiman. Shu o’rinda menga to’rt yil davomida beminnat ta’lim-tarbiya bergan kafedramiz o’qituvchilariga va ilmiy rahbarim Toshov Xudoynazar Ramazonovichga alohida minnatdorchilik bildirib qolaman.