Tuproqshunoslik va geografiya

Sherobod kanali - Surxondaryo viloyatidagi magistral kanali, 1966 yilda qurilgan. Umumiy uzunligi 27 km, bosh qismidagi suv sarfi 110 m³/sek. Viloyatning Sherobod va Qiziriq cho‘llariga suv uzatadi. Janubiy Surxon suv omborining o‘ng qirg‘og‘ida qurilgan bosh suv olish inshootidan suv oladi. Kanal trassasining dastlabki 8 km Surxondaryoning o‘ng qirg‘og‘i bo‘ylab va Toshko‘priksoy o‘zani tagidan 150 metr uzunlikdagi 3 ko‘zli (3x3,5 m) temirbeton quvurli dyuker orqali o‘tadi. Quyiroqda kanaldan Qumqo‘rg‘on kanaliga 10 m³/sek. miqdoridagi suvni tashlash uchun suv chiqargich o‘rnatilgan. 60-yillar oxirida uning 12 km da Sherobod cho‘lidagi 80 ming gektardan ortiq yerni suv bilan ta’minlovchi nasos stansyasi barpo etildi. 27 kmda kanal chap va o‘ng tarmoqqa bo‘linadi. Kanalning chap tarmog‘i Sherobod cho‘lida yangi o‘zlashtirilgan yerlarni sug‘orishga xizmat qiladi. Uning o‘zaniga beton to‘shama yotqizilgan, uzunligi 29,6 km, suv sarfi 25 m³/sek. O‘ng tarmoq esa Sheroboddaryo tizimidagi yerlarni suv ta’minotini yaxshilashga xizmat qiladi, uzunligi 76,6 km.