Тошкент давлат юридик университети фуқаролик ҳУҚУҚИ дарслик II қисм

Назорат учун саволлар:

1.Топшириқ шартномаси тушунчаси, ҳуқуқий белгилари ва шартнома шакли.

2.Топшириқ шартномасида қатнашувчи тарафлар, уларнинг ҳуқуқ ва мажбуриятлари.
3. Фуқаро Д. ўзининг номидан олди-сотди шартномаси тузиш учун фуқаро Т. билан топшириқ шартномасини имзолайдилар. Т. ҳам бевосита худди шу ҳаракатларни амалга ошириш учун фуқаро Ю. га топшириқ шартномаси асосида ишончнома берган.
Савол: Т. ўзига берилган ваколатларни бошқа шахсга топширишга ҳақлими? Ю. нинг харакатлари натижасида келиб чиққан ҳуқуқий оқибатлар кимнинг ҳуқуқ ва манфаатларига таъсир кўрсатади.
4. Фуқаро С. ўзининг тижорат ишларини олиб бориш учун вакил сифатида фуқаро Л. билан топшириқ шартномасини тузган. С. чет эл мамлакатларидан бирида саёҳат қилаётган даврида Л. унинг кўрсат­маларидан четга чиқиб ҳуқуқий харакатлар қилган ва бу ҳақда топшириқ берувчига хабар бера олмаган. С. саёҳатдан келгандан сўнг вакилнинг ҳаракатлари белгиланган ваколатлардан четга чиқиш ва огоҳлантирилмаганлиги сабабли тузилган тижорат битимларни бекор қилиш хақида судга мурожат қилган.
Топшириқ берувчининг ҳаракатлари қонунийми? Қонунга мувофиқ қайси ҳолатларда вакил унга берилган ҳуқуқлардан четга чиқишига йўл қўйилади?


47-боб. Бегона шахснинг манфаатини кўзлаб топшириқсиз
ҳаракат қилиш


1. Бегона шахснинг манфаатини кўзлаб топшириқсиз ҳаракат қилиш тушунчаси ва ўзига хос хусусиятлари.
Ўзбекистон Республикаси Фуқаролик кодексининг 826-моддасига мувофиқ, манфаатдор шахсга ёки унинг мол-мулкига зарар етказилишининг олдини олиш, унинг мажбуриятларини бажариш ёки унинг қонунга зид бўлмаган бошқа манфаатларини кўзлаб, унинг топшириғисиз, бошқа кўрсатмасисиз ёки олдиндан ваъда берилган розилигисиз қилинган ҳаракатлар (бегона шахснинг манфаатини кўзлаб қилинган ҳаракатлар) очиқ кўриниб турган манфаат ёки фойдадан ҳамда манфаатдор шахснинг ҳақиқий ёки эҳтимол тутилган ниятларидан келиб чиқиб ҳамда ишнинг ҳолатларига кўра зарур ғамхўрлик ва эҳтиёткорлик билан қилинмоғи керак
Бегона шахснинг манфаатини кўзлаб топшириқсиз ҳаракат қилиш билан боғлиқ муносабатлар ФКнинг 47-бобида (826-831-моддалари) ҳамда 46,57,58-бобда назарда тутилган қоидалар билан тартибга солинади.
Ушбу бобда назарда тутилган қоидалар бундай ҳаракатлар фаолиятининг мақсадларидан бири бўлган давлат органлари ва фуқароларнинг ўзини ўзи бошқариш органлари бошқа шахслар манфаатлари йўлида амалга оширадиган ҳаракатларга нисбатан қўлланмайди.