Тингловчи Манзурахон Зинабуддиновна

Eнди бугунги китоблар, айниқса бадиий асарлар ҳусусида айрим фикрларни баён этсак: маълумки, китоб умуман, бадиий асар кишиларнинг дунёқараши, ижтимоий-сиёсий салоҳиятини маънавий баркамоллигини таъминлаши лозим. Бундай асарлар, дарҳақиқат, яратилмоқда, халқимиз, айниқса, ёшларимиз уларни ўқишдан чарчамаяпти. Аммо, бугуни асарларнинг барчасига ҳам шундай баҳо қўйиш мумкин эмас. Айрим асарлар яхши ниятда яратилаётган бўлсада, аммо улар “тескари самара” бермоқда. Турли салбий кўринишлар, зўравонлик, ур-йиқит, одамларда “оломон фикрлаш” даражасини кўтаришга уриниш, фаҳш, иллатларни тарғиб этиш каби ҳолатлар баъзи асарларда авж олаётганинг гувоҳи бўлмоқдамиз.
Мутафаккир-алломаларимиз жоҳилликнинг биринчи белгиси-гўзалликни кўрмасликдир, дейдилар. Ҳақиқатдан ҳам шундай. Атрофимизда шунча янгиликлар, янгиланишлар, ислоҳатлар содир бўлмоқда, одамларимиз тафаккур тарзи ўзгармоқда. Ана шу ижобий ҳолатларни бадиий жиҳатдан пишиқ асарлар орқали халқимизга, айниқса ёшларимизга етказиш жуда тўғри бўлар эди.
Маданият, санъат, айниқса бадиий адабиётда замонамиз қаҳрамонини топиш, унинг образини яратиш, назаримизда, ўта долзарб масалалардан биридир. Президент фармойишида кўрсатилган энг муҳим масалалардан бири ҳам шунда. Айримлар замонамиз қаҳрамонини “кўрмайдилар”. Аммо, шу нарсани алоҳида таъкидлаш лозимки, бундай қаҳрамонлар биз билан бирга, орамизда, улар ҳар куни жасорат кўрсатмоқдалар. Айб – биз уларни кўрмаганлигимизда. Ангрен-Поп темир йўлида Фарҳоднинг жасоратини такрорлаган, чегарани мустаҳкамлашда мардлик кўрсатган, янги технологиялар асосида фермерлик ҳаракатининг унумдорлигини ошираётган, турли жаҳон ареналарида мамлакат байроғини баланд кўтараётганлар-булар замонамиз қаҳрамонлари эмасми?
Халқимиз айнан ана шундай китобларни кутмоқда. Айрим ватандошларимиз “ҳозирги ёшларга жиддий бадиий асарларни тавсия этган билан, улар бундай китобларни ўқимайдилар, чунки замон ўзгарди”, дейишмоқда. Тўғри, замон ўзгарди. Аммо бизнинг ўзбеклигимиз ўзгаргани йўқ. Шундай пайтда, ёшларимизнинг китобхонлик маданиятини ошириш, улар маънавий эҳтиёжини шакиллантириш учун ниманидир тавсия этишни баъзан унутаётганга ўхшаймиз. Ёшлар маънавий эҳтиёжини шакиллантириш учун уларга маъноли асарлар тавсия этишимиз лозим.