Юртимизда сўнги йилларда ўтказилаётган ислоҳотлар ва янгиланишлар таҳсинга лойиқ

Юртимизда сўнги йилларда ўтказилаётган ислоҳотлар ва янгиланишлар таҳсинга лойиқ. Буни мамлакатимизнинг турли нуқталарида қурилаётган янги кўп қаватли арзон турар жой бинолари, барпо этилаётган янги туристик иншоотлар мисолида кўришимиз мумкин. Мана шундай туристик иншоотлардан бири Гуллар шахри – Наманганнинг Чортоқ туманида жойлашган “Султон Увайс Қараний зиёратгоҳи”. Халқимиз тили билан айтганда эса “Балиқли Кўл” зиёратгоҳининг реконструксия қилиниши ва “Биби Найма зиёратгоҳи”нинг қайта қурилиши зиёратгоҳнинг кўркига кўрк қўшди. Бундан ташқари Чортоқ туманида қуриб битказилаётган янги сиҳатгоҳ ва дам олиш масканлари, энг кўзни қувонтирадигани эса янги қурилаётган сиҳатгоҳ яқинида қад кўтарган Тож Маҳал кўпчиликнинг эътиборини тортиши турган гап. Ўзгаришлар мана шундай давом эттирилса яқин кунларда бизнинг Чортоқ ҳам гўзал шахарлардан бирига айланади ва шу билан бир вақтга Ўзбекистоннинг туристларни энг кўп жалб қилаётган гўшаларидан бири бўлиши аниқ.
Лекин афсуски, халқимизнинг “Ҳар чиройда бир камчилик бор” деган нақли қанчалик рост эканлигини ҳам Чортоқ мисолида кўришимиз мумкин. Чортоқ туманида жойлашган “Дўстлик” МФЙ ҳудуди билан туман оилавий поликликасини боғлаб турувчи асосий транспорт қатнов йўли тамирга муҳтож. Дарвоқеа, МФЙ идораси ҳам собиқ “7-автобаза” идорасининг эски биносида жойлашган. Бинонинг нафақат ташқи балки ички кўриниши ҳам харобани эслатади. Яна йўл масаласига қайтадиган бўлсак, қорли, музли кунларда йўналиш бўйича қатновчи машиналар ҳаракатини вақтинча тўҳтатишга мажбур бўлишади. Акс ҳолда автомашина билан бирга кўчада қолиб кетиш ҳеч гап эмас. Шу ўринда айтиб ўтиш жоизки, ушбу “Дўстлик” МФЙ ҳудудида жойлашган, оҳирги марта 2008-йилда реконструктрия қилиниб фойдаланишга топширилган, Чортоқ туман ХТБ га қарашли 44- сонли умумий ўрта таълим мактаби ҳақида гапирмасликнинг иложи йўқ. Мамлакатимизда таълим тизимига жуда катта эътибор берилаётган бир вақтда ушбу мактабда ўқув хоналарининг етишмаслиги ачинарли ҳолат. Ўйлайманки, ушбу мақола мутасадди идора вакиллари қўлига ҳам етиб боради ва жавоб тариқасида юқорида таъкидланган камчиликлар тез орада ечимини топади.


Илёсбек Бойдедаев