Тема: Анатомия панинин классификациясы рауажланыу тарийхы хам уйрениу методы

Bas miydi orawshı perdeler

Bas miy úsh qabat perde menen oralǵan: 1. Qattı perde, 2. Tor perde, 3.
Tamırlı (jumsaq) perde.

1. 
   Bas miydiń qattı perdesi, bas súyeginiń ishki (miy táreptegi) júzeleri menen tor perde arasında jaylasqan. Biriktiriwshi toqımadan dúzilgen ádewir qattı, jıltıraq, aqshıl reńdegi bul perde bas súyeginiń ishki júzelerine (ásirese, gelle túbindegi súyeklerge) jabısıp turadı. Sonıń ushında ol tek miy perdesi esaplanıp qalmastan, bálki bas súyeginiń ishki perdesi esaplanadı. Onıń sırtqı qabatı tamırlarǵa bay boladı. Qattı perde arqa miy qattı perdesiniń, tuwrıdan-tuwrı dawamı esaplansa da súyekke jabısıp turǵanlıǵı menen ózgeshelenip turadı. (arqa miydiń qattı perdesi omırtqa diywallarına jabıspay erkin turadı).
   

Qattı perde menen tor perde arasında tar boslıq bolıp onda az muǵdarda suyıqlıq jaylasadı.
Qattı perde ishki (miy) tárepke ózinen bir neshe listler (ósimsheler) beredi.
Qattı perde listleri bazı bir jerlerde, kóbinese, súyeklerdegi qarıqlar aldında bir-birinen ajıralıp, boslıqlar (sinuslar) payda etedi. Bul boslıqlar gelle ishinde hám miyde qan toplawshı juwan venalar funktsiyasın óteydi.

2. 
   Bas miydiń tor perdesi júdá juqa bolıp, miydiń tek ǵana sırtqı (bir tegislikte turǵan) júzelerin qaplaydı, biraq qarıqlar ishine (izvilinalar aralıǵına) kirmeydi. Perde qarıqlar ústinen kópir taqlette ótkeni ushın, astında qarıq esabına boslıqlar payda boladı. Boslıqlarda tınıq miy suyıqlıǵı boladı. Bul boslıqlar miydiń tóbe hám qaptal táreplerinde, derlik birdey úlkenlikte hám shuqırlıqta bolsada, ayırım jerlerde ásirese miydiń astınǵı júzinde júdá keń, kóp suyıqlıq sıydıratuǵın boslıqlar ushıraydı. Bunday boslıqlar háwizler (tsisternalar) delinedi.
   

Tor perde astındaǵı barlıq boslıqlar hám háwizler tek bir - biri menen emes, al arqa miy tor perdesi astındaǵı boslıq hám miy ishindegi tórt qarınshalar menen de tutasqan. Qarınshalar menen tutasıw Mojendi hám Lushka tesikleri arqalı iske asadı.
Tor perdeniń ózinde qan tamırlar bolmaydı. Biraq, bul perdeniń astındaǵı boslıqlarda miy qan tamırları bar. Olar biriktiriwshi toqımalardan dúzilgen. Kese tosıqlar hám usı boslıqlardaǵı suyıqlıqlar qorshawcnda eziliwden, basılıwıdan saqlanadı.

3. 
   Bas miydiń tamırlı (yaki juqa) perdesi, biriktiriwshi toqımadan dúzilgen bolıp, miydi azıqlandırıwda áhmiyetli orın iyeleydi. Onıń arasında júdá kóp mayda qan tamırlar hám nervler orın alǵan.