Тема: Анатомия панинин классификациясы рауажланыу тарийхы хам уйрениу методы

Qulaqtıń baraban perdesi

Baraban perde sırtqı esitiw jolın orta qulaq boslıǵınan ajıratıp turadı. Sırtqı esitiw jolı dep atalıwshı aylana, qarıqsha menen tamamlanadı, baraban perdeniń sheti usı qarıqshaǵa saat aynası óz korpusına ornalasqanday bolıp turadı.
Baraban perde batıńqı dóńgelek formaǵa iye bolıp, juqa elastikalıq qosıwshı toqımadan ibarat. Baraban perdeniń qalıńlıǵı hámme jerde birdey bolmaydı, ortanǵı bólimi juqaraq, sheti qalıńıraq boladı.

Orta qulaq

Orta qulaqtıń quramına baraban boslıǵı‚ hám jutqınshaq penen orta qulaqtı qosıp turıwshı Evstaxiy nayı jatadı. Baraban boslıǵı baraban perdesi menen labirint arasında yaǵnıy sırtqı qulaq penen ishki qulaq arasında jaylasqan. Baraban boslıǵında úsh dana esitiw súyekleri bir - birine shınjır taqlette tutasıp jaylasqan.
Kólemi 0,75mm³ bolǵan baraban boslıǵınıń altı diywalı ajıratıladı.

1. 
   Joqarǵı diywalı baraban boslıǵınıń tóbesi delinip, juqa súyek plastinkadan ibarat bolıp, baraban boslıǵın gelle boslıǵınan ajıratıp turadı.
   
2. 
   Arqa diywalı emizik tárizli ósikke qarap jaylasadı. Arqa diywalınıń ústingi tárepinde bir neshe mayda tesiksheler bolıp, olar baraban boslıǵın emizik tárizli ósik ishindegi hawa saqlawshı ketekler menen baylanıstırıp turadı. Baraban boslıǵınıń arqa diywalınıń tómenireginde, laterial tárepinde piramida kóterińkilik dep atalıwshı ishi bos, tompaq bolıp onda bulshıq et jaylasqan.
   
3. 
   Astıńǵı diywalı yaki moyıntırıq venasına qaraǵan diywalı, baraban boslıǵınıń, túbin payda etedi.
   
4. 
   Baraban boslıǵınıń aldınǵı diywalı ishki uyqı arteriyasına qarap jaylasqan. Ishki uyqı arteriyası menen baraban boslıǵı arasında usı arteriya kanalınıń joqarıǵa kóteriliwshi bólimin qurawshı juqa súyek plastinka jaylasqan. Bul plastinkanıń joqarǵı bóliminde Evstaxiy nayınıń ishki tesigi kórinip turadı.
   
5. 
   Baraban boslıǵınıń medial diywalı labirintke (ishki qulaqqa) qarap jaylasqan. Bul diywal ishki qulaq boslıǵın hám kanalların orta qulaq boslıǵınan ajıratıp turadı. Diywaldıń dál ortasında dóńlik jaylasqan. Dóńliktiń arqaraǵında, tómenirekte baqanshaqqa kiriw sańlaǵı bolıp, bul tesik kishkene baraban perdesi menen qaplanǵan. Dóńlikten joqarıraqta labirintke alıp kiriwshi oval tesik jaylasqan. Oval tesikti úshinshi esitiw súyegi záńgisheniń tiykarı bekitip turadı. Domalaq tesik baqanshaq boslıǵına, oval tesik labirint dálizine alıp kiredi.
   
6. 
   Orta qulaqtıń sırtqı yaki laterial diywalı, sırtqı qulaqqa yaǵnıy baraban perdege qaraǵan.
   

Birinshi esitiw súyegi balǵashaǵa uqsas bolǵanı ushın oǵan balǵasha delinedi, balǵashanıń dástesi baraban perdege tiyip, onı sırtqı qulaq tárepke biraz bórttirip turadı. Buǵan baraban perdesiniń kindigi delinedi. Balǵashanıń dóńgelek bası, ekinshi esitiw súyegi tóstemirge buwın payda etip tutasadı. Tóstemirdiń uzın ayaqshası úshinshi esitiw súyegi záńgishe menen buwın payda etip birigedi. Záńgisheniń keńeygen plastinkası ishki qulaqtıń dálizine kiriwshi oval tesikti bekitip turadı.