Таълим вазирлиги самарқанд иқтисодиёт ва сервис институти

Натижаларни баҳолаш ва жараёнлар мониторинги. Маъмурий ислоҳотларга тизим орқали ёндашув мавжуд муаммоларни аниқлаш ва уларга барҳам бериш борасидаги давлат аппарати фаолиятини кузатишни таъминловчи механизмларни талаб этади. Маъмурий ислоҳотларни боришини баҳолаш ҳам жуда муҳимдир. Бу ерда давлат аппарати фаолияти самарадорлигини белгиловчи кўрсаткичларни ишлаб чиқиш алоҳида эътиборни талаб этади.


12.3. Глобаллашув шароитида маъмурий ислоҳотларни амалга ошириш имкониятлари
Бугунги кунда кўпчилик хукуматлар олдида жахон миқиёсида иқтисодий рақобатнинг кескинлашуви муаммоси турибди. Тобора авж олаётган иқтисодиётларнинг глобаллашуви жараёнидан орқада қолмаслик ва ўз мамлакатининг халқаро рақобатда тўлиқ иштирок этишини таъминлаш кўплаб мамлакатларда давлат бошқарувида ислоҳотларни амалга оширилишига сабаб бўлди.
Жаҳон тажрибаси кўрсатишича, жамиятнинг тўлақонли ижтимоий-иқтисодий ривожланиши давлат бошқарувининг қандай ташкил этилганлиги, ҳокимиятнинг марказий қисмининг маҳаллий қисми билан муносабатлари не чоғли яхши йўлга қўйилгани, ваколатларнинг қанчалар аниқ тақсимланганлиги масалалари билан бевосита боғлиқдир. Бошқарув аппарати ҳажмининг катталиги, айрим вазифаларнинг такрорланиши, бошқарувнинг илмий асоси йўқлиги, давлат устидан жамоат назоратининг етарли даражада амалга оширилмаслиги ижрочи ҳокимият самарадорлигини пасайишига олиб келади ва бюрократиянинг авж олишига, ҳамда бизнесни юритиш йўлида ғояларнинг кўпайишига сабабчи бўлади.
Глобализация шароитида ривожланган мамлакатларда давлат бошқаруви механизмини такомиллаштириш шунчалар аҳамиятли вазифа экан, бозор иқтисодиёти механизмлари эндигина жорий этилаётган мамлакатлар учун бу энг муҳим вазифа эканлигига шубха йўқ. Тажрибанинг камлиги ва етук мутахассисларнинг етишмаслиги каби бир қатор муаммолар иқтисодиёти ўтиш даврини бошдан кечираётган ва ривожланаётган мамлакатларда бу жараённинг ҳамиша ҳам самарали натижа бермаётганининг асосий сабаблари ҳисобланади. Шу ўринда глобаллашув жараёни сабабли юзага келиши мумкин бўлган салбий оқибатларни ҳам эътибордан четда қолдирмаслик, уларнинг олдини олиш бўйича ҳимоя чораларини амалга ошириш муҳим аҳамиятга эга.