Ш. А. Султонов реал секторни давлат томонидан тартибга солиш

Ишлаб чиқариш хавфсизлиги - бу товар ва хизматларни яратиш жараёнини мунтазам ва чекловларсиз бир меъёрда ўсиб боришига шароит мавжудлигини билдиради.
Ишлаб чиқариш хавфсизлиги таъминланганда иқтисодий барқарорлик мавжуд бўлади, яъни миллий иқтисодиёт бир маромда ривожланиб боради. Бунда ишлаб чиқариш қобилияти сақланган ҳолда ЯИМнинг жон бошига ҳисобланган ҳажми ортиб боради. Бундан ташқари хавфсизлик ишлаб чиқаришнинг технологик даражаси ва миллий иқтисодиётдаги меҳнат унумдорлиги, ишлаб чиқаришни инновацияларга мойиллиги, ишлаб чиқариш таркибий тузилишини бозор талабига мослиги, иқтисодиётни танглик пайдо бўлганда ундан кичик талофотлар билан чиқиш, яъни уни жон бошига сақлай билиши кабиларни билдиради.
Молиявий хавфсизлик иқтисодий хавфсизликнинг муҳим томонидир. Молиявий хавфсизлик таъминланган ерда молиявий барқарорлик ҳукм суради. Шундай бўлганда иқтисодиётнинг реал сектори билан молиявий секторлари бир-бирига мос равишда фаолият юритади.
Молиявий хавфсизлик иқтисодиётнинг ички ва ташқи субъектлари ўртасидаги пул оқимини барқарор бориши учун шароит ҳозирлигини билдиради.
Хавфсизлик бу давлат бюджети дефицитсиз бўлиши, дефицит юзага келганда уни кичик бўлиши, миллий пул қадр-қийматини барқарор бўлиши, банклар капиталининг етарли бўлиши, мамлакатдаги олтин-валюта захираларини (буни халқаро захиралар, деб ҳам юритишади) етарли бўлиши молия бозорини бир маромда ишлаб туришини билдиради. Пул оқими бу иқтисодиёт учун озуқадир, уни тўхтовсиз бориши иқтисодий ўсишнинг муҳим шарти ҳисобланади, чунки бусиз товар ва хизматларни ўз вақтида айирбошланиши юз бермайди.
Монетар хавфсизлик, яъни пул муомаласининг хавфсизлиги алоҳида ўрин тутади. Бу муомаладаги пул миқдорини иқтисодиёт кўламига мос бўлишини талаб қилади, чунки пул етишмай қолса иқтисодий оборот сустлашади. Бордию пул кўпайиб кетса инфляция хавфи туғилади. Шу сабабли иқтисодиётни монетизация (пул билан таъминланиш) даражаси етарли бўлиши талаб қилинади, шунга қараб пул миқдори кўпайтирилади ёки камайтирилади. Миллий валюта (пул) мамлакат доирасидаги ягона тўлов воситаси бўлади, четдан келадиган молиявий тажовуз йўлини тўсувчи чегара яратади, чунки ўзга пул мамлакат ички бозорида ўтмайди. Шу сабабли миллий пулни мустаҳкамлаш хавфсизликка хизмат қилади. Умумий пул бор жойда (масалан, еврозонада) миллий хавфсизликка эришиш учун умумий пул – еврони мустаҳкамлаш керак бўлади, чунки бу пул нафақат умумий бозорда, балки миллий бозорда ҳам ягона тўлов воситаси функциясини бажаради.