Ш. А. Султонов реал секторни давлат томонидан тартибга солиш

Энергетика хавфсизлиги. Миллий иқтисодиёт барқарор ўсиб бориши учун унинг ҳамма соҳалари узлуксиз ва етарли миқдорда энергия билан таъминланиши керак бўлади. Сарфланадиган энергия турлари ҳам талабга жавоб бериши зарур. Энергия хавфсизлиги таъминланмаса иқтисодиёт издан чиқади.
Энергетика хавфсизлиги – бу мамлакатдаги барча энергия истеъмолчиларини энергоресурслар билан етарли миқдорда ва уларга оғирлик қилмайдиган нархларда узлуксиз таъминланиб туришларини билдиради. Иқтисодиёт саноатлашган сари, аҳоли турмуш маданияти ўсган сари ишлаб чиқаришда ва кундалик аҳоли турмушида энергия талабманд машина, ускуна ва асбоблар кўп қўлланилади. Иқтисодиётда узлуксиз энергия таъминотига эришиш учун ўз энергоресурсларидан тўлиқ фойдаланиш, улар етишмаган тақдирда импортини мунтазам бўлишига эришиш керак бўлади. Хавфсизлик энергия таъминотида коллапс (тўхтаб қолиш) бўлишига йўл қўйилмасликни билдиради, чунки бу иқтисодий коллапсга олиб келиши мумкин.
Энергетика хавфсизлиги қуйидаги йўллар билан таъминланади:
1. Энергия яратиш ва уни узатишнинг энг самарали усулларини қўллаш.
2. Энергоресурслар манбаларини диверсификациялаш, яъни янги манбаларини ишлатиб энергия истеъмоли бир манбага боғлиқ бўлишига йўл қўймаслик.
3. Экологик тоза энергоресурсларни кенг қўллаш, бу билан энергия истеъмоли экологик зарарсиз бўлади.
4. Энергия истеъмолида тежамкорликка эришиш. Нафақат ишлаб чиқариш балки уй турмушида ҳам энергия сарфи кам бўлган машина, асбоб ва ускуналарни ишлатилиши.
5. Ерости тикланмайдиган энерго ресурслар тугалланиб борганидан доимо тикланиб турадиган энергоресурслардан кенг фойдаланиш керак бўлади. Шу ўринда биоэнергия (ўсимликларни чириш энергияси), шамол ва қуёш ерости сувлари ҳамда денгиз тўлқинлари энергиядан фойдаланиш энергетика хавфсизлиги учун истиқболли саналади.
6. Энергия истеъмолини бир маромда ва узлуксиз боришига эришиш турли давлатларнинг энергия таъминоти тизими бир-бирига уланади, яъни давлатлараро энергия таъминотига ўтилади. Бу билан энергия таъминоти канда қилмай амалга оширилади. Энергия ресурсларини олдиндан келишилган нархларга биноан етказиб берилади, булар энергия истеъмолчиларига ҳам маъқул бўлади.