Ш. А. Султонов реал секторни давлат томонидан тартибга солиш

Ташқи иқтисодий алоқалар хавфсизлиги. Хавфсизликни ташқи жиҳати ҳам бор, чунки миллий иқтисодиётлар бир-бирига боғлиқ бўлиб қолади. Улардан ҳар бирининг хавфсизлиги бошқасининг хавфсизлигига бориб тақалади. Бу айниқса, экспорти катта мамлакатларда яққол кузатилади.
Ташқи иқтисодий алоқалар хавфсизлиги – бу мазкур алоқаларни мунтазамлиги ва миллий манфаатларга мос бўлишини билдиради.
Ташқи иқтисодий алоқалар хавфсизлиги экспорт ва импорт узлуксиз равишда ҳамда манфаатли бўлишини, четдан капитални кириб келиши иқтисодий ўсишни таъминлаши, капитални чиқиб кетиши зарарли бўлмаслиги, ташқи савдода экспортнинг катта бўлиши мамлакат валюта захираларининг сақланиши ёки ўсиб боришини таъминлайди.
Ижтимоий хавфсизлик. Бу миллий хавфсизликни муҳим жиҳати ҳисобланади, чунки бунга иқтисодий барқарорлик боғлиқ бўлади. Ижтимоий мувозанат бузилиб, аҳолининг турли қатламлари ўртасида тўқнашувлар бўлиб, тўс-тўполон юз берганда иқтисодиёт катта зарар кўради. Шу боис, ижтимоий барқарорлик катта аҳамиятга эга.
Ижтимоий хавфсизлик аҳолининг турли ижтимоий гуруҳлари ўртасида ўзаро муроса ва тинч-тотувлик муносабатининг қарор топиши ва ижтимоий мувозанатнинг мавжудлигини билдиради. Хавфсизлик аҳоли турли тоифалари ўртасидаги партнёрлик (шерикчилик) муносабатлари қонун йўли билан ўрнатилганда қарор топади. Ижтимоий барқарорлик юзага келиши учун барча тоифадаги аҳоли манфаатлари уйғунлашуви, улар зидлик ҳолатига келганда ўз вақтида бартараф этилиши керак бўлади. Бунинг учун камбағал аҳолининг кўпайиб кетиб меъёридан ортишига йўл бермаслик талаб қилинади.
Бозор кучлари аҳолини табақалашувига олиб келади, шу сабабли давлат буни олдини олади. Камбағалларни янада камбағаллашуви шароитида бойларни янада бойиб кетишига йўл қўймаслик чораларини давлат қўллаши керак бўлади. Давлат бойларга катта солиқ солиб, бундан тушган пулни камбағалларга ёрдам сифатида тарқатади, ночорларни бепул овқатлантириш, кийинтириш, бепул даволаш ва турар жой билан таъминлашга сарфлайди. Камбағалларга турли хайр-эҳсон фондлари ҳам ёрдам қўлини чўзади.
Хуллас, ижтимоий хавф-хатарни олдини олиш ва бартараф этиш учун давлатдан фаол ижтимоий сиёсат юргизиш талаб қилинади.