Ш. А. Султонов реал секторни давлат томонидан тартибга солиш

Озиқ-овқат хавфсизлиги. Буни озиқ-овқат ресурсларини чекланган бўлиши ва уларни аҳоли истеъмолини қондиришга етишмай қолиши талаб қилади. Мутлақ етишмовчилик келиб чиққанда умуман озиқ-овқат, унинг сифатидан қатъий назар етишмай қолиб, очлик хавфи туғилади. Озиқ-овқатни нисбий етишмовчилиги сифатли (гўшт-ёғ, сут-қатиқ, мева-сабзавот) маҳсулотларни аҳоли истеъмоли учун озлигини билдиради. Бу ерда қорин тўқ бўлади, лекин бу юзаки тўқлик бўлиб, сифатсиз маҳсулотлар ҳисобидан пайдо бўлади, шу сабабли сифатли маҳсулотларга муҳтожлик мавжуд бўлади.
Озиқ-овқат хавфсизлиги – бу кишиларни миқдоран етарли ва сифати жиҳатидан қониқарли озиқ-овқат билан узлуксиз таъминланиб туришидир.
Хавфсизлик бўлиши учун қуйидагилар талаб қилинади:
1. Мамлакатнинг имкони борича ўзини-ўзи таъминлаб, импортга камроқ қарам бўлиши.
2. Овқатланиш берадиган куч-қувват соғлом яшаш учун етарли бўлиши, бир кунлик озиқ-овқат энг камида 2600 каллория, кўп бўлганда 3500 каллория бериши.
3. Озиқ-овқат сифатли бўлиб, унинг таркибида оқсил, ёғ, витаминлар ва минерал моддаларга бой маҳсулотлар етарли бўлиши.
4. Асосий озиқ-овқат маҳсулотларининг нархи кўпчилик аҳоли учун оғирлик қилмаслиги.
5. Аҳолининг озиқ-овқат учун сарфи унинг истеъмол харажатларининг ярмидан ошмаслиги.
6. Йиғилган озиқ-овқат захиралари аҳоли таъминотида жиддий узилишларга йўл бермаслиги.
Хавфсизликни таъминлаш учун озиқ-овқат ишлаб чиқаришни аҳоли сонини ўсишига нисбатан жадалроқ ўсишига эришиш зарурки, бу экин майдонларини кенгайтириш, ҳосилдорликни ошириш (генетик модификациялашган маҳсулотларни кўпайтириб бўлса ҳам) талаб қилади. Қишлоқ хўжалигига катта инвестициялар юбориш, аграр ислоҳотларни чуқурлаштириш, фермерларни қўллаб-қувватлаб, уларга бошқа ердагилардан кам бўлмаган даромад топишга имкон бериш керак бўлади.
Ҳозир дунё аҳолиси 7 млрд. ортиқ бўлса 2050 йилга бориб 10 млрд нафарга етади. Бу Осиё ва Африка ҳисобидан бўлади, шу боис у ерда озиқ-овқат тақчиллиги кучайиши мумкин. Ҳозирнинг ўзидаёқ, бу ерда очлик кузатилади. Масалан, 2016 йили ер юзидаги оч қолган кишилар сони 1,1 млрд нафарга етди. Бу озиқ-овқат хавфсизлигини жиддий қилади, чунки очликдан йилига 35 минг киши ўлади.