Сценарий муаллифи: Донохон Хамидуллаева Ҳам муаллиф: Шоирахон Рустамова Режиссёр: Шохрух Ҳайдаров

Севинч: Тўй қиламиз, фақат яқин дўстлар, яқинлар орасида ўтказамиз.
Гулзода опа катта қизига қараб: Ана кўрдингми, синглингни онаси ўлган, тўйларини ҳам қандай ўтказишни йигитчаси билан келишиб олибди. Йўқ мен бунга чидолмайман.
Севинч: Ойи данғиллатиб тўй қилсак ҳам гапирадиганлар барибир айб топиб гапириб кетади. Тўйдан кейин эса қарзга ботиб, ўзимиз қийналамиз. Ундан кўра ихчам, кам ҳаражат тўй қилиб, бахтли бўлсак бўладику.
Гулзода опа бошини ушлаб: Сен қиз мени пичоқсиз сўйдинг, ипсиз осдинг. Орзуларимни чил парчин қилдинг. Бор билганингни қил. Менга деса ўша яланоёққа тегавер. Лекин билиб қўй, мен на сарпо, на мебель себелингни қилмайман. Сепсиз олса тегавер. У етимчага қиладиган сарполарим йўқ. Лекин кейинчалик уним кам, буним кам деб, менга йиғлаб келиб юрма.
Севинч хурсанд бўлиб, онасини қучиб: Рахмат ойижон, ҳеч қачон ундай деб келмайман. Менга сепингиз керамас, розилигингиз бўлса етади. Мен Жавоҳир акамга айтай, совчиларини жўнатаверсинлар... деб чиқиб кетади.
Осиё: Ойи тўғри қилдингиз. Қарши чиққанизда барибир у билан кетиб қолиб, шарманда қилармиди деб қўрқиб тургандим. Майли ўзи пиширган ош, айланиб ҳам ўргилиб ҳам ўзи ичади энди.
Гулзода опа: Дилшодга нима дейман энди? Осиё: Қизим воз кечмайман, агар мажбурлаб Дилшодга берсангиз ўзимни у бу нарса қиламан деяпти дея қолинг.Гулзода қизига тикилиб қолади... ЗТМ...
9 – ЭПИЗОД.
Кадрда лавашхона олди.
Яна Дилшод уришгани келган. У бир чеккада Жавоҳирни ёқасидан олиб, унга дўқ қиляпти: Менга қара, сенга охирги марта яхшиликча айтяпман. Севинчдан воз кеч. Бўлмаса мажбурлаб бўлсаям воз кечдираман.
Жавоҳир уни қўлини бир силтаб, шартта Дилшодни томоғидан бўғиб олиб: Шунча ҳурматингни қилдим. Осмон қўлингда бўлсачи ташлаб юбор. Сенга яна бир марта айтаман, то Севинч ўзи мендан воз кечмагунча мен кечмайман. Дўқингни бориб, бойвочча отангга қилгин... деганча уни бир силтаб юборади. Дилшод машинасига урилиб тўхтайди.