Психология юнон тилидан таржима қилинганда – таълимот, жон билим тўғрисида (“psyche” – жон, руҳ ва “logos” – таълимот, илм) деган маънони англатади

Спорт психологияси – бу спортда турли хил психологик механизмларнинг шаклланиши ва намоён бўлиш қонуниятларини ўрганадиган психологик фан соҳасидир. (Wikipedia, 2019)
Спорт психологияси – бу биринчи навбатда, махсус шароитларда спорт фаолияти билан шуғулланувчи шахснинг хусусиятларини ўрганадиган психология фани соҳасидир. (В.А.Родионова, А.В.Родионова, В.Г.Сивицкого, 2019)
Спорт психологияси – бу спорт тадбирлари ва машғулотлари жараёнида инсон психикасига дахлдор мусобақа олди ҳамда мусобақа вақтидаги ўзгаришларни динамик табиатининг психологик қонуниятларини ўрганадиган фаннинг соҳасидир. (Д.Н.Арзикулов, Н.Ш.Умарова, 2018)
Бошқа психология соҳалари билан чамбарчас боғлиқдир. Жумладан, умумий психология, ижтимоий психология билан биргаликда илмий изланишлар олиб боради. Бу фан спортчиларнинг спортда юқори натижаларга эришишлари йулида хизмат қилади. Кишиларнинг спорт фаолияти унинг бошқа фаолият турларидан фарқ қилади. Спорт фаолиятининг асосини жисмоний маданият машғулотлари ва спорт психологияси фанининг асосий вазифаси спортчиларни спорт мусобақаларида қатнашишга тайёрлашдан иборат. Бу тайёргарлик жараён спортчилардаги махсус жисмоний сифатларни, кўникмаларни, қобилиятларни шакллантириш, билимларни устириш, жисмоний ва руҳий қийинчиликларни енгиш кабиларга пайдо бўладиган жисмоний ва руҳий тайёргарлик услубларини янада такомиллаштиришни талаб қилади. Шунингдек, спорт психологияси фани спортчининг ўз гуруҳ аъзолари билан тўғри ўзаро муносабатлар ўрнатиш йўлларини кўрсатади. Спортчининг жисмоний, психологик, тактик, техник тайёргарлигини ҳам ўрганади. Спорт психологияси ҳар бир спорт турини (масалан, футбол психологияси, сузиш психологияси, мусобақа фаолиятининг психологияси) алоҳида ўрганади. Спорт психологияси фанининг ривожланиш тарихи жуда қисқа булиб, ўтган асрнинг 60-йилларини охирига келиб ривожлана бошлаган. Собиқ иттифоқ даврида мазкур фан бўйича ўкув адабиётлари ва илмий-тадқиқот ишлари Россия олимлари томонидан ёзилган. Мустақиллик йилларида Ўзбекистонда ҳам спорт психологияси фани буйича дарслик, ўқув қўлланмалар ёзилмоқда.
Спорт психологиясининг пайдо бўлишининг биринчи босқичида жисмоний машқ билан шуғулланган кишиларнинг психик жараёнига таъсири (ақлий, иродавий) ўрганилган бўлса, аста-секин кишиларнинг бошқа хусусиятларига таъсир этиши, масалан, спортчининг ҳаракат малакалари, ҳиссий-иродавийлик сифатлари, стартдан олдинги психик ҳолати, малакаларининг афтоматлашиш шакллари кабилар ҳам ўрганила бошланди.