Buyrug‘i maktabgacha ta’limga qo‘yiladigan davlat talablarini tasdiqlash haqida

4-§. Madaniy-gigiyenik ko‘nikmalarni rivojlantirish
45. 6 oylikkacha bo‘lgan bolalar madaniy-gigiyenik ko‘nikmalarni o‘zlashtirib borishlari
lozim.
46. Cho‘milish vaqtida o‘ynash va cho‘milishdan zavqlanishning paydo bo‘lishi 6
oylikkacha bo‘lgan bolalarda madaniy-gigiyenik ko‘nikmalar rivojlanishining indikatori
hisoblanadi.
47. 6 oylikkacha bo‘lgan bolalar bilan quyidagi mashqlarni o‘tkazish lozim:
suv bilan o‘ynashni rag‘batlantirish;
buyumlarni suvga itarish va suv ichida yurgizishni rag‘batlantirish;
quvnoq bolalar she’rlari, sanamachoqlardan foydalanib, qo‘lni qanday yuvish va tish
tozalash kerakligini ko‘rsatish.
48. 6 oylikkacha bo‘lgan bolalarni qarovsiz qoldirish taqiqlanadi.
V bob. Ijtimoiy-hissiy rivojlanish
1-§. Ijtimoiy rivojlanish
49. Quyidagilar 6 oylikkacha bo‘lgan bolalarda ijtimoiy rivojlanish talablari hisoblanadi:
tanish va notanish odamlarni ajrata olish;
boshqa bolalar va katta yoshdagilar bilan muloqotda bo‘lganda o‘z ko‘nikmalarini
orttirish qobiliyatiga ega bo‘lish.

---

50. Quyidagilar 6 oylikkacha bo‘lgan bolalarda ijtimoiy rivojlanish indikatorlari
hisoblanadi:
yaqin kishilari bilan muloqot qilishda tashabbus bildirish (ko‘zlariga qarash, jilmayish,
yopishish, qo‘llariga chiqib olishga harakat qilish, qichqirib yuborish, yengini tortish);
notanish odamlarni ko‘rganda qo‘rquv alomatlarini namoyon etish, yig‘lash;
onasi va boshqa tanishlari tomon qo‘llarini uzatish;
katta yoshdagilarni ko‘rganda anchagina jonlanishni namoyon etish;
tanish katta odamning nutqiga nisbatan hissiy munosabat bildirish.
51. Bola bilan munosabatlarda quyidagilarga amal qilish lozim:
bolani ko‘proq qo‘lga olish, quchoqlash, u bilan so‘zlashish. Bunda bolaning notanish
odamlarni ko‘rganda cho‘chishi normal holat hisoblanadi;
oila a’zolarining barchasi bola bilan muloqotda bo‘lishi;
bolaga qo‘shiqlar, she’rlar aytib berish;
bolaning yoniga boshqa bolalarning yaqinlashishiga ruxsat berish;
bolaning boshqa odamlar, bolalar bilan tovush chiqarib muloqot qilishini
rag‘batlantirish.
52. 6 oylikkacha bo‘lgan bolalarning xavfsiz yashashi va harakatlanishini ta’minlash
uchun quyidagilar taqiqlanadi:
bolaning notanish odamlar bilan muomala qilishiga yo‘l qo‘yish;
bola bilan birga jamoat joylari va shovqinli tadbirlarga borish;
bolani kichik yoshli bolalar bilan yolg‘iz qoldirish;
uyda kuchli shovqin chiqaruvchi asbob-uskunalardan foydalanish.