Buyrug‘i maktabgacha ta’limga qo‘yiladigan davlat talablarini tasdiqlash haqida

3-§. Sensomotorikani rivojlantirish
173. 2 yoshdan 3 yoshgacha bo‘lgan bolalarning sezgi organlari yordamida o‘z
harakatlarini tartibga solishni uddalashi ularda sensomotorika rivojlanishining talabi
hisoblanadi.
174. Quyidagilar 2 yoshdan 3 yoshgacha bo‘lgan rivojlanishining bolalarda
sensomotorika rivojlanishining indikatorlari hisoblanadi:
narsalarning tuzilishi turlichaligini ajrata olish;
chiqayotgan ovoz manbai tomon harakatlanish;
oziq-ovqatlarni ularning ta’mi va hidi bo‘yicha ajratish.
175. 2 yoshdan 3 yoshgacha bo‘lgan bolalar ta’limiga quyidagicha yondashish lozim:
bolaga turli materiallar va yuzasining tuzilishga ko‘ra turlicha (dag‘al, silliq, mayin,
yopishqoq) bo‘lgan teksturalarni berish;
bola bilan odam yoki hayvonning harakatlariga taqlid qiladigan o‘yinlarni o‘ynash;
bolaning ovoz manbaini topishini rag‘batlantirish;
bolani ovqat tayyorlash jarayonlariga jalb qilish va u bilan o‘ynash, ta’m va hidning
farqini tushuntirish.
176. Bolalarning xavfsiz yashashi va harakatlanishini ta’minlash uchun ko‘zlar
gigiyenasi va gimnastikasiga o‘rgatish, bola bilan mashq qilish muddati 10 — 15 daqiqadan
oshib ketmasligiga ahamiyat berish lozim.
4-§. Madaniy-gigiyenik ko‘nikmalarni rivojlantirish
177. 2 yoshdan 3 yoshgacha bo‘lgan bolalar o‘zini parvarishlay olishlari va madaniy-
gigiyenik ko‘nikmalarini orttirishlari lozim.
178. Quyidagilar 2 yoshdan 3 yoshgacha bo‘lgan bolalarda madaniy-gigiyenik
ko‘nikmalar rivojlanishining indikatorlari hisoblanadi:
mustaqil ravishda qo‘llarini sovun bilan yuvish, sovun ko‘pigini suvda yuvib tashlash va
keyin sochiq bilan artish;
mustaqil ravishda qoshiq bilan ovqat yeyish;
salfetkadan foydalanish;
suvda cho‘milish va o‘ynash jarayonlariga ijobiy munosabat bildirish.
179. 2 yoshdan 3 yoshgacha bo‘lgan bolalar ta’limiga quyidagicha yondashish lozim:
qo‘l va tishlarni bosqichma-bosqich yuvishni ko‘rgazmali namoyish etish (plakat)
usulidan foydalanish;
agar bola yangi va notanish sharoitlarga tushib qolgan bo‘lsa, unga yordam berish, lekin
uning barchasini o‘zi mustaqil uddalashiga ishonchini hosil qilish;
ovqatlanish vaqtida bolaga yordam berish;

---

stol atrofida o‘tirish va tartibli ovqatlanish madaniyatining ahamiyatini tushuntirish;
muvaffaqiyatga erishganligi uchun rag‘batlantirish.
180. 2 yoshdan 3 yoshgacha bo‘lgan bolalarning xavfsiz yashashi va harakatlanishini
ta’minlash maqsadida quyidagilarga amal qilish lozim:
bolaning yuvinishi uchun xona haroratiga mos suvdan foydalanish;
qaynoq suv bilan tana a’zolarini kuydirib qo‘yish holatlarining oldini olish;
bolalar uchun mo‘ljallangan sovun bo‘lagining o‘lchamlari 3,5 x 5 sm dan katta
bo‘lmasligini ta’minlash.