O‘zbekiston Respublikasining Iqtisodiy protsessual kodeksi

214-modda. Korporativ nizolar bo‘yicha da’voni ta’minlash choralari
Korporativ nizolar bo‘yicha da’voni ta’minlash choralari ushbu Kodeksning 8-bobida nazarda tutilgan tartibda sud tomonidan ko‘riladi.
LexUZ sharhi
Qarang: Mazkur Kodeksning 93 — 100, 212, 213-moddalari.
LexUZ sharhi
Qo‘shimcha ma’lumot uchun qarang: O‘zbekiston Respublikasi Oliy xo‘jalik sudi Plenumining 20.06.2014-yildagi “Iqtisodiy sudlar tomonidan korporativ nizolarni hal etishning ayrim masalalari to‘g‘risida”gi 262-sonli qarorining 8-bandi.
27-bob. Huquqiy ta’sir choralarini qo‘llash to‘g‘risidagi ishlarni yuritish
215-modda. Huquqiy ta’sir choralarini qo‘llash to‘g‘risida murojaat qilish huquqi
Huquqiy ta’sir choralarini qo‘llash to‘g‘risidagi arizalar bilan sudlarga nazorat qiluvchi organlar murojaat etishga haqli.
LexUZ sharhi
Qarang: Mazkur Kodeks 68-moddasining ikkinchi qismi.
216-modda. Huquqiy ta’sir choralarini qo‘llash to‘g‘risidagi ishlarni ko‘rish
Huquqiy ta’sir choralarini qo‘llash to‘g‘risidagi ishlar ushbu Kodeksda nazarda tutilgan qoidalar bo‘yicha, mazkur bobda belgilangan xususiyatlar inobatga olingan holda ko‘riladi.
LexUZ sharhi
Qarang: Mazkur Kodeksning 215, 217 — 222-moddalari.
217-modda. Huquqiy ta’sir choralari
Huquqiy ta’sir choralari quyidagilardan iborat:
faoliyatni tugatish;
atrof tabiiy muhitga zararli ta’sir ko‘rsatayotgan obyektlar faoliyatini tugatish va (yoki) qayta ixtisoslashtirish;
faoliyatni cheklash, to‘xtatib turish va taqiqlash, bundan favqulodda vaziyatlar, epidemiyalar hamda aholining hayoti va sog‘lig‘i uchun boshqa haqiqiy xavf yuzaga kelishining oldini olish bilan bog‘liq holda faoliyatni o‘n ish kunidan ko‘p bo‘lmagan muddatga cheklash, to‘xtatib turish hollari mustasno;
banklardagi hisobvaraqlar bo‘yicha operatsiyalarni to‘xtatib qo‘yish, bundan qonunda nazarda tutilgan hollar mustasno;
moliyaviy sanksiyalarni qo‘llash, bundan soliqlar va boshqa majburiy to‘lovlar to‘lash muddatini o‘tkazib yuborganlik uchun penyalar hisoblash, shuningdek yuridik shaxsning yoki fuqaroning sodir etilgan huquqbuzarlikdagi aybini tan olganligi va moliyaviy sanksiyalar summalarini ixtiyoriy ravishda to‘laganligi hollari mustasno;
tadbirkorlik faoliyatining ayrim turlari bilan shug‘ullanish uchun litsenziyalarning (ruxsatnomalarning) amal qilishini o‘n ish kunidan ko‘p bo‘lgan muddatga to‘xtatib turish yoki ularning amal qilishini tugatish va litsenziyalarni (ruxsatnomalarni) bekor qilish, bundan O‘zbekiston Respublikasi Vazirlar Mahkamasi va O‘zbekiston Respublikasi Markaziy banki tomonidan beriladigan litsenziyalar (ruxsatnomalar) mustasno.
Oldingi tahrirga qarang.
Sud qonunchilikka muvofiq boshqa huquqiy ta’sir choralarini ham qo‘llashi mumkin.
(217-moddaning ikkinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
LexUZ sharhi
Qarang: Mazkur Kodeksning 215, 216, 218 — 222-moddalari.
LexUZ sharhi
Qo‘shimcha ma’lumot uchun qarang: O‘zbekiston Respublikasi Oliy xo‘jalik sudi Plenumining 28.12.2007-yildagi “Iqtisodiy sudning xususiy ajrimi to‘g‘risida”gi 172-sonli Qarori 1-bandining 2-xatboshisi.