O`zbekiston Respublikasining davlat tili o`zbek tilidir

Birgalik nisbati. Bu nisbat harakatning bir necha shaxs tomonidan birgalikda bajarilishini bildiradi.
Birgalik nisbati quyidagicha yasaladi:
1. Fe`l negizlarga -sh, -ish qo`shimchalarini qo`shish bilan: yozishdi, kelishdi, borishdi, ko`rishdi.
2. Fe`llarga -lash qo`shimchasini qo`shish bilan: suhbatlashdi, gaplashdi, bahslashdi. Birgalik nisbatdagi fe`llar quyidagi ma`nolarni anglatadi.
1. Harakatning bajarilishida bir necha shaxs birgalikda qatnashadi. Bunday gaplarda ega ko`pincha ko`plik shaklida ifodalanadi. Bolalar kitob o`qishdi. Normurodga qarashli boshqarma xodimlari esa uni vahimali bir sukut bilan kutib olishdi. (O.Yo.) Harakat bir necha kishi tomonidan bajarilib, har bir shaxs harakatning egasi bo`ladi. Shuningdek, shaxslardan biri ikkinchisiga nisbatan harakatning ob`ekti bo`ladi. Chunki bunday fe`llarda harakat bajaruvchilarning biridan ikkinchisiga o`tadi. Masalan, Eson Davlat begim mudaarris bilan mazhablar to`g`risida bahslashib o`tirishni istamadi. (P.Q.) Obidov bilan Latofat barobar o`girilib qarashdi. (O. Yo.)
Orttirma nisbat. Bu nisbat harakatni boshqa biror shaxsning ta`siri bilan bajarilishini ifodalaydi, ya`ni harakatning bajarilishi uchun boshqa biror kishi vosita bo`ladi. Orttirma nisbat fe`l negiziga quyidagi qo`shimchalarni qo`shish bilan hosil bo`ladi.
1) -t qo`shimchasini qo`shish bilan: o`qit, ishlat, gullat, bezat kabi
2) -dir, -tir qo`shimchasini qo`shish bilan: yozdir, kuldir, uzdir, terdir, choptir, uzaytir kabi. - tir qo`shimchasi -t qo`shimchasi orqali hosil bo`lgan orttirma nisbatdan yana orttirma nisbat hosil qiladi, o`qit -o`qittir, kengayt - kengaytir. 3) -giz, -g`iz, -gaz, -qiz, -kaz, -qaz qo`shimchalari bilan : ko`r, giz, yurg`iz, turgiz, yotqiz, o`tkaz, yutqaz.
4) -ir, -ar qo`shimchalari bilan: pishir, qaytar sat qo`shimchasi bilan hosil bo`lgan ko`rsat fe`li orttirma nisbatdir. Biroq bu qo`shimcha bilan hosil bo`lgan shu nisbatdagi fe`llarning yuzaga kelishi aktiv emas.