O’zbekistоn respublikasi Оliy va O’rta maxsus ta’lim vazirligi

КИРИШ


Диссертация мавзусининг долзарблиги. Дунёнинг ривожланган мамлакатларида ўқитишнинг замонавий педагогик ва ахборот технологиялари асосида ташкил этиш, таълим тизимига рақамли таълим ресурсларини самарали қўлланиши таълим сифати ва самарадорлигининг ошишига ижобий таъсир кўрсатмоқда. 2030 йилгача янги таълим концепциясида “Таълим - тараққиётнинг асосий ҳаракатлантирувчи кучи ва барқарор ривожланиш мақсадларга этказувчи муҳим фаолият” сифатида эътироф этилган. Унда малакали ўқитувчиларни тайёрлашда педагогик, интегратив билимлар; ўқитиш технологиялари, замонавий методлар, таълимий воситалардан, узлуксиз таълимда ахборот технологияларидан фойдаланишга алоҳида эътибор берилган¹.
Жаҳонда таълим тизимини такомиллаштиришда ахборот-таълимий ресурслари воситасидан фойдаланишнинг мазмуни, методлари, воситалари ва шаклларини тадқиқ этиш таълим тизимида долзарбликни талаб этмоқда. Бу эса ўз навбатида электрон таълим ресурсларидан самарали фойдаланиш, интерактив таълим хизматларини сифатли амалга ошириш, педагогик жараёнлар ва таълим муҳитини фаол ахборот алмашиниш жараёнлари билан интеграциялаш масалаларининг педагогик-психологик ечимига қаратилганлиги билан аҳамиятлидир.
Республикамизнинг узлуксиз таълим муассасаларида замонавий ва ахборот таълим технологияларидан фойдаланиш асосида ривожлантириш, моддий техник базасини мустаҳкамлаш, ўқув жараёнига замонавий ахборот технологияларини жорий этиш ва қўллаб-қувватлаш даражаси ошди. Яратилган шарт-шароитлар биология таълими сифатини таъминлаш ва компетенциявий ёндашув асосида талабаларни касбий фаолиятга тайёрлаш заруратини юзага келтирмоқда. Педагогик таълим мазмуни олий таълимнинг норматив-ҳуқуқий асослари ва қонунчилик нормалари, педагогнинг касбий компетентлиги ва креативлиги, масофавий таълим асосида ўқитиш, таълим беришнинг замонавий муҳитини шакллантириш баробарида ёшларда билим, кўникма ва малакаларини таркиб топтириш масалалари назарда тутилади.
Ўзбекистон Президентининг 2020 йил 27 февралдаги “Педагогик таълим соҳасини янада ривожлантириш чора-тадбирлари тўғрисида”ги ПҚ-4623 қарорида, янги таҳрирдаги ЎРҚ-637 23.09. 2020 “Таълим тўғрисида”ги Қонунда таълим жараёнида замонавий таълим технологияларини қўллаш кўникмаларига эга профессионал педагог кадрлар тайёрлаш, рақобатбардош кадрлар тайёрлаш тизимида илмий ва замонавий фаолиятни самарали ташкил этиш, олий педагогик таълимга рақамли технологияларни жорий этиш, педагогик ва техник билимларни мустаҳкам интеграциясини таъминлаш пировардида педагог кадрларнинг касбий маҳоратини узлуксиз ривожлантириб бориш асосий мақсадлардан этиб белгиланганлиги, ҳамда, мазкур масалага оид бошқа меъёрий – ҳуқуқий ҳужжатларда белгиланган вазифаларни амалга оширишда мазкур диссертация тадқиқоти муайян даражада хизмат қилади.