O’zbekiston respublikasi oliy va o’rta maxsus ta’lim vazirligi samarqand veterinariya meditsinasi instituti

Kasallikning zarari. Bu ashaddiy kasallik O’zbekistonda uzum hosilini 50 foizgacha pasaytiradi, ba’zi mavsumlarda esa 100 foizi yo’qotilishiga olib keladi.

Zararlanadigan o’simliklar. Oidium bilan madaniy tok turlari (Vitis vinifera va b.) va Vitaceae oilasiga mansub boshqa turlar zararlanadi. Mevasi rangli va nordonroq uzum navlari kamroq zararlanadi. O’zbekiston sharoitida Soyaki va Nimrang Muskat navlari oidiumga yuqori tolerantlik namoyon qilgan.

Qo’zg’atuvchining belgilari. Qo’zg’atuvchi askomiset zamburug’ Uncinula necator, anamorfasi Oidium tuckeri – obligat parazit. Gifalari zararlangan organlar ustida joylashib, ularga xarakterli, pallachalardan tashkil topgan apressoriylari yordamida yopishadi, apressoriylardan infeksion gifalar o’sadi, ular kutikulaga va so’ngra epidermis ichiga kirib, u yerda gaustoriylar paydo qiladi. Kleystotesiylarhar doim rivojlanmaydi, barcha zararlangan organlar ustida paydo bo’lishi mumkin, dumaloq, diametri 68-130 mkm, oldin rangsiz, keyin sariq, yetilganlari to’q-qo’ng’ir tusli, har birining ichida 3-7(9) xaltachalari mavjud. Peridiy (qobig’i) ning hujayralari 4-6 qirrali, diametri 10-23 mkm. Kleystotesiy ustida 7-20(40) ta o’simtasi bor, uzunligi 130-600 mkm, ostki qismi qo’ng’ir, uchi rangsiz, spiral shaklida buralgan.