O’zbekiston respublikasi oliy va o’rta maxsus ta’lim vazirligi samarqand veterinariya meditsinasi instituti

Kimyoviy himoya uchun oltingugurt preparatlari (tuyilgan kukuni, n. kuk., kolloid, sus. k., ohakoltingugurt qaynatmasi va b.) yuqori samara bilan qo’llaniladi. O’zbekistonning quruq ob-havoli iqlimida kukun shaklidagi oltingugurt ishlatish yuqori samara beradi, yomg’irli ob-havoda esa suspenziya qo’llash tavsiya qilinadi. Oltingugurt preparatlari tokni havo harorati 25-30^oS bo’lganida kasallikdan yaxshi himoya qiladi, 18-20^oS da deyarli samara bermaydi. Harorat 30^oS dan oshganda u o’simliklarga fitotoksik ta’sir ko’rsata boshlaydi, shu sababdan 35^oS va undan yuqori haroratda oltingugurtni ishlatish tavsiya qilinmaydi. Oltingugurt kukuni (15-30 kg/ga) yoki OOQ (0,5-1^o) bilan birinchi ishlov bahorda tok gullashidan oldin, birinchi xomtokdan so’ng darhol berilishi lozim, keyingi ishlovlar, ob-havo sharoitlari va kasallik rivojlanishini hisobga olgan holda, har 10-15 yoki 20-30 kunda, hammasi bo’lib bir mavsumda 7-10 ta ishlov beriladi. Oltingugurt kukunini yo’ldan olingan mayda chang bilan 1:1 nisbatda qo’shib ishlatish ham yaxshi samara beradi. Tok sug’orilishi lozim bo’lsa, ishlovni sug’orishdan so’ngra berish lozim. Oidiumga qarshi boshqa fungisidlar oltingugurtdan kamroq qo’llaniladi, ulardan Bayleton (Botir) 25% n.kuk. (0,15-0,3 kg/ga), Bamper (Krest) 25% em.k. (0,25 l/ga), Vektra 10% sus.k. (0,3 l/ga), Impakt 25% sus.k. (0,1-0,15 l/ga), Saprol 20% em.k. (1,0-1,5 l/ga), Topaz 10% em.k. (0,2-0,25 l/ga), Fulpas 10% em.k. (0,2-0,25 l/ga), Topsin-M 70% n.kuk. (1,0 kg/ga), Folikur BT 22,5% em.k. (0,15 l/ga) va Torso 22,5% em.k. (0,15 l/ga) tavsiya qilingan. Bu fungisidlarni mavsumda 2-3 marta (gullashdan oldin, birinchi ishlovdan 20-30 va 40-60 kun o’tgach) qo’llash tavsiya qilinadi.