O‘zbekiston respublikasi milliy gvardiyasi harbiy-texnik instituti

JK 52-moddasi 2-qismiga asosan, «Oliy harbiy yoki maxsus unvonga yoxud O‘zbekiston Respublikasining davlat mukofotiga ega bo‘lgan shaxs og‘ir yoki o‘ta og‘ir jinoyati uchun hukm qilinganida sudning hukm asosida kiritadigan taqdimnomasiga binoan mazkur unvon yoki mukofotdan mahrum qilinishi mumkin».
Mazkur moddani tahlil qilishdan, oliy harbiy yoki maxsus unvonlar, shuningdek, davlat mukofotlari yuzasidan sud faqat tegishli unvonni
yoki mukofotni bergan organga jinoyatni sodir etishda aybdor deb topilgan shaxsni undan mahrum qilish to‘g‘risidagi taqdimnoma kiritishga haqli ekanligi kelib chiqadi. Shunday qilib, unvon yoki mukofotdan mahrum qilish masalasini uzil-kesil hal qilish faqat ushbu shaxsga tegishli unvon yoki mukofot bergan organga yuklatiladi.
Oliy harbiy unvonlar – bu oliy ofitserlik tarkibiga beriladigan unvonlardir (general-mayor, general-leytenant, general-polkovnik, armiya generali). Oliy maxsusunvonlar – belgilangan xizmatlarda beriladigan oliy harbiy unvonlarga aynan teng bo‘lgan unvonlardir. Bundan tashqari, oliy maxsus unvonlarga, shaxslarga alohida kasbiy fazilatlari, mahorati va ko‘p yillik vijdonan mehnati uchun beriladigan faxriy unvonlar ham kiradi (masalan, O‘zbekiston Respublikasi xalq artisti, xizmat ko‘rsatgan me’mor, xizmat ko‘rsatgan yurist va hokazo).
O‘zbekiston Respublikasining davlat mukofotlari – fuqarolarni vatanni himoya qilishda, iqtisodiyot, fan, madaniyat, san’at, ma’rifat, davlat qurilishi, sog‘liqni saqlash, tarbiya sohasida, xayriya faoliyatida ko‘rsatgan xizmatlari uchun va boshqa xizmatlari uchun taqdirlash shaklidir. Amaldagi qonunchilikka muvofiq, davlat mukofotlari quyidagilardir: «O‘zbekiston Qahramoni» unvoni, ordenlar, medallar, O‘zbekiston Respublikasi faxriy unvonlari va Faxriy yorlig‘idir ¹.
Davlat mukofotlaridan mahrum qilish oliy harbiy yoki maxsus unvonlardan mahrum qilishga qo‘llanadigan tartibda amalga oshiriladi.
Shuni hisobga olish kerakki, mahkum shaxslar JK 52-moddasida ko‘rsatilmagan boshqa unvonlari yoki mukofotlaridan mahrum etilishi mumkin emas. Jumladan, sud ilmiy unvonlar va darajalardan (masalan, fan nomzodi yoki doktori darajasi, katta ilmiy xodim, dotsent va professor ilmiy unvonlari), shuningdek, sport, kasbiy malakaviy razryadlaridan mahrum qilishi mumkin emas. Bundan tashqari, chet el davlatlari tomonidan berilgan unvonlar va mukofotlardan mahrum qilishga yo‘l qo‘yilmaydi.
¹ Қаранг: Ўзбекистон Республикасининг 1995 йил 22 декабрдаги «Давлат мукофотлари тўғрисида»ги 176–I-сон Қонуни, 2- модда // Ўзбекистон Республикаси Олий Мажлисининг Ахборотномаси, 1995 й., 12-сон, 266-модда.