O’simlik to‘qimalari. To’qimalar Tuzilish va funksiyalari

G‘amlovchi parenxima. Bu parenxima hujayralarida kraxmal, yog‘, oqsil va vita’minlar kabi zaxira oziq moddalar to‘planadi. Bunday to‘qima urug‘li o‘simliklarning hamma organlarida bor. Urug‘lardagi g‘amlovchi hujayralarda ularning po‘sti ba’zan qalinlashgan bo‘ladi.

G‘allasimon o‘simliklar urug‘laridagi g‘amlovchi parenximada ko‘pincha kraxmal va oqsillar, burchoqdoshlar oilasiga mansub o‘simliklarda (loviya, no‘xat, mosh, beda va hokazo) oqsillar, kraxmal va yog‘lar (araxisda) to‘planadi. Tuganaklar, ildizmevalar, ildizpoyalar va shu kabilarda kraxmal hamda qand moddalari yig‘iladi. Hattoki kraxmal donachalari lavr, zaytun, magnoliya kabi o‘simlik barglarida ham ko‘p to‘planadi. Har xil qimmatli zaxira oziq moddalar mevalar tarkibida ko‘p bo‘ladi. Ho‘l mevalarning parenximalarida saxaroza, fruktoza, glyuqoza hamda har xil vita’minlar va tannidlar to‘planadi. To‘planadigan zaxira moddalar eriydigan va erimaydigan bo‘ladi. Kraxmal, aleyron donachalari, yog‘ moddalari, erimaydigan moddalar guruhiga kirib, ular asosan g‘amlovchi parenxima hujayralarining sitoplazmasida saqlanadi.

Aminokislotalar, amidlar, suvda eriydigan oqsillar, uglevodlar, vita’minlar, tannidlar eriydigan moddalar guruhiga kirib, ular g‘amlovchi hujayralarning ham sitoplazmasida, ham hujayra shirasi tarkibida uchraydi.