O’quv qo’llanma

Er solig’i 1994 yil 1 yanvardan qishloq xo’jaligiga taalluqli bo’lmagan erlar uchun joriy qilingan. Respublika byudjeti daromadlarida uning solishtirma hissasi jami byudjet daromadlarining 0,7%ni tashkil qildi. 1995 yil 1 yanvardan boshlab qishloq xo’jaligi ishlab chiqarishida foydalaniladigan erlar uchun er solig’i undiriladigan bo’ldi. Bu soliq 1 gektardan tabaqalashtirilgan holda zonalar va er turlari bo’yicha er uchastkasining joylashgan o’rni va suv bilan ta’minlanganligi hisobga olingan holda undiriladi. 1995 yilda uning solishtirma hissasi 2,3%; 1996 yilda – 3,0%, 1997 yilda 3,6% bo’ldi.
1998 yildan qishloq xo’jaligi ishlab chiqaruvchilari uchun ilgari to’lab kelingan barcha soliqlar o’rniga yagona er solig’i joriy qilindi. Bu soliq ham O’zbekiston Respublikasi Vazirlar Mahkamasi tomonidan belgilaydigan tabaqalashgan stavkalarda undiriladi.
Byudjet daromadlarida er solig’ining solishtirma hissasi 1998 yilda 5,0%ni, 1999 yilda 5,4%ni tashkil qildi.
O’z mulkida, egaligida yoki foydalanishida er uchatskalariga ega bo’lgan yuridik va jismoniy shaxslar er solig’i to’lovchilari hisoblanadi.
Er solig’i yuridik shaxslar tomonidan har yili 1 yanvargacha bo’lgan holatga qarab mustaqil hisoblab chiqariladi va soliq bo’yicha hisob-kitoblar er uchastkasi joylashgan xududdagi soliq organiga
joriy yilning 1 fevraligacha taqdim etiladi. Ular soliqni har chorakda teng hissada chorak ikkinchi oyining 15 sanasiga qadar to’laydilar.
Qishloq xo’jaligi korxonalari er solig’ini bir yilda bir marta - hisobot yilining 15 dekabrigacha to’laydilar. Jismoniy shaxslardan undiriladigan er solig’i soliq organlari tomonidan hisoblab chiqariladi.
To’lov xabarnomasi joriy yilning 1 mayidan kechiktirmay topshiriladi. Jismoniy shaxslar er solig’ini joriy yidning 1 noyabrigacha to’laydilar.
Er solig’ini hisoblab chiqarish va byudjetga to’lash – 1998 yil 5 feraldagi 404-sonli “Er solig’ini hisoblab chiqarish va to’lash tartibi to’g’risida”gi yo’riqnomaga ko’ra (kiritilgan o’zgartirishlar va qo’shimchalar bilan) amalga oshiriladi.