Қон яратилишига таъсир этувчи воситалар

Цианокобаламин (витамин В₁₂) – хавфли (пернициоз) анемияда қўл-ланилади. Унинг етишмовчилигида эритропоэз мегалобластик турда кечади: эритробласт → гиперхром мегалобласт → мегалоцит. Пернициоз анемиянинг келиб чиқиши цианокобаламин сўрилишининг бузилиши билан боғлиқ, чунки бундай беморларда Каслнинг ички омили бўлмайди (кимёвий тузилиши бўйича – гликопротеин). Одатда у меъда шиллиқ қаватида ҳосил бўлади ва цианокобаламиннинг ингичка ичакда сўрилишини таъминлайди. Хавфли анемияда цианокобаламин қон манзарасини меъёрлаштиради ҳамда неврологик бузилишларни ва тил шиллиқ қаватининг шикастланишини камайтиради ёки бартараф этади, аммо меъда ширасининг ахлоргидрияси сақланиб қолади.
Фолат кислотаси (витамин В_с) – макроцитар анемияда қўлланилади. Фолат кислота етишмовчилигида макроцитлар ҳосил бўлади: эритробласт → гиперхром макронормобласт → макроцит. Организмда фолат кислотаси фо-лин кислотасига айланади ва у физиологик фаолликка эга. Асосан фолат кислотаси алиментар ва медикаментоз анемияда, спру касаллигида (сурункали касаллик бўлиб, диарея, глоссит, анемия, умумий толиқиш ва эндокрин безларнинг гипофункцияси билан кечади), ҳомиладорлар анемиясида қўллани-лади. Хавфли анемияни даволаш учун фолат кислотасини алоҳида ишлатиш мумкин эмас, чунки унинг таъсирида нерв тизими томонидан кузатиладиган бузилишлар ўтиб кетмасдан, аксинча, кучайиб кетиши мумкин. Унда фақат қон манзарасигина яхшиланиши мумкин. Шунинг учун хавфли анемияда фолат кислотасини цианокобаламин билан бирга қўллаш тавсия этилади.
Эритропоэзни сусайтирувчи воситалар асосан полицитемияда (эритре-мияда) ишлатилади. Бундай воситалардан бири фосфор-32 билан нишонланган натрий фосфат эритмаси ҳисобланади. Унинг таъсирида эритроцитлар ва тромбоцитларнинг миқдори камаяди. Ичишга ва в/и киритишга тавсия қилинади. Милликюри (мКи) ларда дозаланади.
ЛЕЙКОПОЭЗГА ТАЪСИР ЭТУВЧИ ВОСИТАЛАР
Лейкопенияда ва агранулоцитозда (агранулоцитар ангинада, алиментар-токсик алейкияда, турли кимёвий моддалар билан заҳарланишларда, нур касаллигида) лейкопоэзни кучайтирувчи воситалар ишлатилади. Бу мақсадда натрий нуклеинати ва пентоксил препаратлари қўлланилади. Аммо, улар лейкопениянинг енгил турларида яхши самара беради.