Қон яратилишига таъсир этувчи воситалар

ТОМБОЦИТЛАР АГРЕГАЦИЯСИГА, ҚОН ИВИШИГА ВА ФИБРИНОЛИЗГА ТАЪСИР ҚИЛУВЧИ ВОСИТАЛАР
Гемостаз жараёнини тромб ҳосил қилувчи тизим билан ўзаро функционал боғланган тромболитик (фибринолитик) тизим биргаликда амалга оширади. Организмда бу иккита тизим динамик мувозанатда бўлади ва маълум бир ҳолатларда биринчисининг ёки иккинчисининг фаолияти ошиб кетади. Масалан, томирлар жароҳатланганда қон кетиши билан биргаликда томирлар тораяди, тромбоцитлар қовушқоқлиги ва қоннинг ивиши кучайиб, тромб ҳосил бўлади ва қон оқиши тўхтайди. Шу билан бирга, меъёрда кучли тромб ҳосил бўлиши келиб чиқмайди, чунки бу фибринолитик жараён ёрдамида камайтириб турилади. Юқоридаги иккита тизимдан бирининг бузилиши ёки қон кетишининг кучайишига ёки тарқалган тромбоз келиб чиқишига олиб келади. Ана шу ўзгаришларни бартараф этиш учун ушбу тизимларга таъсир этувчи препаратлар ишлатилади.
Тромб ҳосил бўлишига таъсир этувчи воситалар қуйидаги гуруҳларга бўлинади:
I. Тромбознинг олдини олиш ва даволаш учун ишлатиладиган воситалар
1. Тромбоцитлар агрегациясини камайтирувчи воситалар (антиагре- гантлар)
2. Қон ивишини пасайтирувчи воситалар (антикоагулянтлар)
3. Фибринолитик воситалар (тромболитик воситалар)
II. Қон кетишини тўхтатувчи воситалар (гемостатиклар)
1. Қон ивишини кучайтирувчи воситалар
а) маҳаллий ишлатилувчи воситалар
б) тизимли таъсир кўрсатувчи воситалар
2. Антифибринолитик воситалар


ТРОМБОЗНИНГ ОЛДИНИ ОЛИШ ВА ДАВОЛАШ УЧУН
ИШЛАТИЛАДИГАН ВОСИТАЛАР
Бу гуруҳ воситалари тромбофлебитларни даволашда, миокард инфарктини мажмуавий даволашда, тромбоэмболияларнинг олдини олишда, микроциркуляциянинг бузилишларида кенг ишлатилади.
АНТИАГРЕГАНТЛАР
Тромбоцитлар агрегацияси тромбоксан-простациклин тизими орқали бошқарилади. Ҳар иккала бирикма ҳам организмда арахидон кислотасининг парчаланиш маҳсулотлари ҳисобланувчи циклик эндопероксидлардан ҳосил бўлади ва тромбоксан ва простациклин рецепторларига таъсир қилади.