Чархлаш Эзиб тайёрланган қоплама остида чархлаш бир муҳим қисми билан ажралиб туради: бошқа қопламалар остида тайёргарлик кўришдан фарқли равишда тўқималарнинг юпқа қатлами олинади.
1. Дастлаб олмосли ва карбонрудали халқалар ёрдамида окклюзион юза 0,28 – 0,5 мм гача чархланади. Қалинлиги материалга кўра ўзгаради, қоплаш ўтказиладими ёки йўқ. Олтин ёки кумуш-палладийли қотишма олинган ҳолатларда тўқималар, айниқса озиқ тишлар ва курак тишларда кесувчи қиррадан кўпроқ шлифовкаланади, чунки протез узоқ муддатларга хизмат қилиши учун ички юзасига олтиндан кавшар қуйилади.
2. Мумнинг юмшоқ полоскаси ёрдамида чархланаётган тиш ва антагонист орасида етарлича бўшлиқ мавжудлиги текширилади, бемордан уни тишлаш сўралади, уларнинг бир-биридан ажралиб қолганлиги олинган излар бўйича баҳоланади.
3. Сўнгра сепарцион олмосли дисклар, фасонли бошчалар билан проксимал юзаларни чархлашга ўтилади.
4. Эзиб тайёрланган коронка остида чархлашни лунж ва танглай юзада тугаллайдилар. Чўгир цилиндрик бўлиши лозим, унинг диаметри бўйин қисмининг диаметрига мос келиши лозим. Шунда эзиб тайёрланган коронка зич жойлашади ва осон милк чуқурчасига киради. Агар диаметр фарқ қилса, унда сунъий қоплама ё жойлашмайди, ёки лапанглаб қолади.
Метал қопламаларни эзиб тайёрлаш усули. Артикуляторга фиксация қилинган гипсли моделлар кўздан кечирилади ва тайёрлаб қўйилган тишни антогонистлар билан ажралганлик даражаси текширилади. Кўз учун ишлатиладиган скальпел билан, тиш бўйни контурларининг аниқлигини бузаётган гипс олиб ташланади. Гравировка, тишнинг бўйин олди қисмининг шикастланишига йўл қўймаслик учун, эҳтиёткорлик билан олиб борилади. Ортиқча гипс эҳтиёткорликсиз билан олиб ташланганда унинг периметрининг қисқариши ёки, аксинча кенгайиши рўй беради. Милк эгатчасини чуқурлаштириш керак эмас, фақат унинг аниқ контурларини белгилаб олиш лозим. Агар тишлар орасидаги масофа қолип олувчи материал билан аник тасвири чикмаган ва гипс билан тўлса, уни эҳтиёткорлик билан юпқа эговча ёки кўз учун ишлатиладиган скальпел билан олиб ташланади. Милк қиррасининг контури тиш бўйнининг барча периметри бўйлаб аниқ ифодаланган бўлиши лозим. Учи ўткир қилиб очилган кимёвий қалам билан тишнинг клиник бўйни чизиб чиқилади. Ҳосил бўлган чизиқ қоплама қиррасининг узунлиги ва кенглиги, ҳамда унинг милк тарновчасига кириб борганлик даражасини аниқлаш учун мўлжал бўлиб хизмат қилади.
Cунъий қопламанинг анатомик шакли махсус модел яратувчи мум ва модел яратувчи шпател билан тикланади. Биринчи қатламни олиш учун гипсли тишнинг чўгирига қайноқ мум қуйилади. Гипсли моделни цоколь қисмини юқорига қаратиб ушлаб турилади, қайноқ мум билан шпател учи эса тиш юзасига бироз бурчак остида бўйин қисмидан кесувчи қиррага ёки чайнаш юзасига қўйилади. Бу эриган мумнинг бўйин соҳасига тушишини олдини олишга ва контурининг аниқлигини сақлаб қолишга имкон беради. Бундан ташқари, қайнаб турган мум гипс билан ишончли уланишни таъминлайди. Гипсли тиш юзасига қаватма-қават эриган мумни қуйиб, анатомик шаклининг тикланиши учун керак бўлган хажмнинг ошишига эришилади. Модели яратилаётган тишда антогонист тишларнинг изини тушириш учун уларнинг окклюзион юзасига ёғ, вазелин суртилади ёки оддий сув билан намланади. Илиқ мумда антагонистларнинг изини тушириб олгандан сўнг сунъий қоплама моделини яратишга ўтилади. Бунинг учун мум дастлаб совитилади, сўнгра эса анатомик шаклни олишга тўсқинлик қилувчи ортиқчаси скальпел ёки шпател билан олиб ташланади. Модели яратилган тишнинг хажми эзиб тайёрланган қопламанинг металли қалинлигида кичиклаштирилади - 0,25-0,3 мм. Чайнаш юзасининг рельефи табиий тишларнинг ёшга доир хусусиятларини ҳисобга олиб модели яратилади. Модели яратилгандан сўнг мум юзаси ўткир бурчакларсиз ва қирраларсиз силлиқ бўлиши лозим. Ён тишларнинг чайнаш юзаси ёки олд қатордаги юқори тишлар, яъни антагонистлар билан контактда бўлувчи барча юзалар металл қалинлигида ажратилади. Қопламанинг ҳаддан ташқари емирилиши бўлган соҳаларда тиш ўлчами ёки контурларини тиклаш талаб этилади, моделлаштириш шунингдек бўлажак қопламанинг қалинлигини ҳисобга олиб амалга оширилади. Мум билан анатомик шакл тиклангандан сўнг гипсли ва метал штампларни тайёрлашга ўтилади.
Модели яратилган тиш гипсли моделдан кесиб олинади. Тишнинг коронка қисми бўйлама ўқ йўналиши бўйлаб тахминан яна икки коронка баландлигида давом этиши лозим. Илдизли қисми деб аталувчи гипсли штампнинг қалинлиги бўйин соҳасида кўндаланг кесимнинг профилига аниқ мос келиши лозим. Штампнинг бу қисмининг торайиши ёки кенгайиши табиий тиш бўйнининг ўлчамидан фарқ қилувчи ноаниқ ўлчамли кириш тешиги бўлган сунъий қопламанинг тайёрланишига олиб келади.
Гипсли штампга белги қўйиш бир неча усуллар билан амалга оширилади. Баъзи ҳолатларда кимёвий қалам билан белгиланган тишнинг клиник бўйнидан тахминан 1мм чекиниб, унга параллел равишда чуқурлиги 0,5 мм бўлган ариқча очилади. Бу ариқча метал қоплама қиррасининг узунлигини аниқлаш учун хизмат қилади. Бошқа усул бўйича аввал кимёвий қалам билан биринчисидан 1мм масофада бўлган иккинчи чизиқ белгилаб олинади, сўнгра эса иккинчи чизиқдан яна 1мм га чекиниб, ариқча ўйилади. Бу усулнинг биринчи усулдан афзаллиги шундан иборатки, ариқча бўйлаб коронкани аввалдан қисқартириш кейинчалик унинг узунлигини кимёвий қалам билан белгиланган иккинчи чизиқ бўйича аниқлаб олишга имкон беради. Аввалдан яратилган узунлик запаси коронканинг ҳаддан ташқари қисқариш эҳтимолини камайтиради ва шу билан протезни тайёрлашда аниқликни таъминлаб беради.
