Одами эрсанг демагил одами, Ониким йўқ халқ ғамидин ғами. Алишер навоий

САМИМИЙЛИКДА ТЕНГИ ЙЎҚ ЭДИ
Юртда тинчлик ва осойишталикни сақлашни бениҳоя савобли иш дейишади. Бу хизматда узоқ йиллар ишлаб ҳурмат-эътиборга эришиш ҳаммага ҳам насиб этавермайди. Фориш туманининг Илончи қишлоғида туғилиб ўсган Назим ака Маҳамматов ички ишлар идораларида кшп йиллар хизмат қилиб, полковник унвони билавн истеъфога чиқди. Дастлаб уни Жиззах вилояти ИИБ фахрийлар кенгашига раис этиб сайлашди. Кейинчалик эса у вилоят ИИБ бошлиғининг маслаҳатчиси лавозимига тайинланди.
--- Бир китобда ўқигандим, --- деди ички ишлар идоралари фахрийси, истеъфодаги полковник Назим Маҳамматов. --- Донишманддан шогирди:
--- Мен қандай қилиб кишилар қалбидан жой олишим мумкин? --- деб сўрабди.
Донишманд:
--- Одамларга самимий муносабатда бўл, ана шунда сени ҳамма севиб эслайди, --- дебди.
Мен Абдураҳмон ака Ражабов билан авваллари деярли учрашмагандим. Тақдир тақозоси билан унинг укаси Абдужаббор акага қуда бўлдим. Ана шунда бир тадбирда қудамникига бордим. Абдураҳмон Ражабов мени эски қадрдонлардай кутиб олди. У мен билан суҳбатлашар экан, эшитган, кўрганлар бу иккови кўпдан бери таниш экан деб ўйлаган бўлиши мумкин. Аслида эса мен биринчи марта у инсон билан суҳбатлашаётгандим. Унинг самимий гаплари, самимий эзгу тилаклари ҳамон қулоғим остида жаранглайди. Мен ички ишлар идораларида узоқ йиллар хизмат қилдим. Жуда кўп инсонлар билан учрашдим, суҳбатлашдим, мулоқотда бўлдим, аммо Абдураҳмон акадек самимий, камтар инсонни учратмадим. У киши республикамиздаги нуфузли олий ўқув юртининг ректори вазифасида ишласа-да, ўзини бошқалардан устун қўйишга ҳаракат қилмас, сўзлашганда ҳам фориш шевасида овозини баландлатмай гапирарди.
Кейинчалик қудамникида ва бошқа унинг қариндошлариникидаги тадбирларда яна учрашиб суҳбатлашдик. Абдураҳмон ака бир мен эмас Абдужаббор ака ва кичик укаси Ғофуржоннинг қудалари билан ҳам самимий муносабатда бўлар, бу билан у миллий анъанага мувофиқ қудачиликни жойига қўярди.
Абдураҳмон ака билан бир марта суҳбатлашган одам яна у билан учрашиш, суҳбатидан баҳраманд бўлиш истагида бўларди. Бу самимий инсон ҳаммага бир хил муносабатда бўлгани учун ҳам қалблардан чуқур жой олган.
***