Nr I vendimit Data palët faqe

VENDIM

NË EMËR TË REPUBLIKËS

Kolegji Administrative i Gjykatës së Lartë, i përbëre nga :

Ardian Dvorani Kryesues

Evelina Qirjaku Anëtare

Medi Bici Anëtar

Në datën 16.10.2014 mori në shqyrtim në dhomën e këshillimit çështjen Administrative me nr.31003-03411-00-2014 akti që ju përket palëve :
PADITËS: MIRASH GJOKEJA

TË PADITUR: Z.R.P.P. KRUJË

FERIDE TEMA

ARJANA TEMA

FLUTURA TEMA

MEHMET TOLI

PERSON I TRETË: KOMUNA THUMANË
OBJEKTI:

1. Saktësimin e sipërfaqes dhe kufijve te pronës

sipas aktit të marrjes se tokës në pronësi nr.132, datë 30.08.1995

për pasurinë nr.69/7 me sipërfaqe 3250m2.

2. Detyrimin e palës se paditur ZRPP Krujë të bëjë regjistrimin

e kësaj pasurie sipas te dhënave qe përmban ky akt.

3-Çregjistrimin e çdo pasurie tjetër pranë ZRPP Kruje

qe është regjistruar mbi pronën nr.69/7, përkatësisht te paditurve

Feride Tema, Arjana Tema, Flutura Tema, Mehmet Toli.

4. Konstatimin e pavlefshmërisë se pasurisë se paluajtshme

nr.69/11 me sipërfaqe 500 m2 e ndodhur në Derven Krujë

me nr.Kontrate 119/65/4, datë 17.01.2011

dhe te transaksionit tjetër të bërë pranë ZRPP Krujë.

5. Kthimin e palëve ne gjendjen e mëparshme.

Baza Ligjore: Neni 31 i K.Pr.Civile

dhe nenet 72, 79, 106, 149, 157, 192, 193 e vijues të K.Civile.

Gjykata e Rrethit Gjyqësor Krujë, me vendimin nr.16, datë 21.01.2014 ka vendosur:

Shpalljen e moskompetences për gjykimin e çështjes civile nr.77/533 Akti nga Gjykata e Rrethit Gjyqësor Krujë.

Dërgimin e akteve Gjykatës Administrative të Shkallës së Parë Tiranë.

Gjykata Administrative e Shkalles se Parë Tiranë, ne veprimet pregaditore, datë 04.04.2014 ka vendosur:

Të ngrejë çështjen e mosmarrëveshjes për kompetencë përpara Gjykatës së Lartë

KOLEGJI ADMINISTRATIV I GJYKATËS SE LARTË

Pasi dëgjoi relacionin e gjyqtarit Ardian Dvorani dhe diskutoi çështjen në tërësi,

V Ë R E N

Paditësi Mirash Gjokaj, në bazë të ligjit nr.7501, datë 09.07.1991 “Për Token”, nga Komisioni i Ndarjes Tokës të fshatit Derven është pajisur me tokë në parcelat nr.43/10 me siperfaqen 1500 m2 , nr.50/3 me sipërfaqen 2000 m2 dhe nr.69/7 me sipërfaqen 3250 m2, gjithsej me sipërfaqen 6750 m2.

Paditësi është paraqitur në Z.V.R.P.P Krujë për ta regjistruar këtë pronë dhe i është refuzuar regjistrimi, me pretendimin se kjo pasuri figuron me mbivendosje, me pronën e të paditurin Muharrem Tema.

Në këto kushte paditësi është drejtuar Gjykatës së Rrethit Gjyqësor Krujë me padi ku ka kërkuar:

1-Saktësimin e sipërfaqes dhe kufijve të pronës sipas aktit të marrjes së tokës në pronësi nr.132, datë 30.08.1995 për pasurinë nr.69/7 me sipërfaqe 3250 m2.

2-Detyrimin e palës së paditur ZRPP Krujë të bëjë regjistrimin e kësaj pasurie sipas të dhënave që përmban ky akt.

3-Çregjistrimin e çdo pasurie tjetër pranë ZRPP Krujë është regjistruar mbi pronën nr.69/7 përkatësisht të paditurve Feride Tema, Arjana Tema, Flutura Tema, Mehmet Toli.

4-Konstatimin e pavlefshmërisë së pasurisë së lajthime nr.69/11 me sipërfaqe 500 m2 e ndodhur në Derven Krujë me Kontrate nr.119/65/4, datë 17.01.2011 dhe të transaksionit tjetër të bërë pranë ZRPP Krujë.

5-Kthimin e palëve në gjendjen e mëparshme.

Gjykata e Rrethit Gjyqësor Kruje, me vendimin nr.16, datë 21.01.2014 ka shpallur moskompetencën lëndore dhe dërgimin e çështjes për gjykim në Gjykatën Administrative të Shkallës së Parë Tiranë, pasi në bazë të nenit 7 të Ligjit nr.492012 “Për organizimin dhe funksionimin e gjykatave administrative dhe gjykimin e mosmarrëveshjeve administrative” dhe vendimit nr.3, datë 06.12.2013 të Kolegjeve të Bashkuara të Gjykatës së Lartë, kjo gjykatë ka kompetencën lëndore për të gjykuar mosmarrëveshjet administrative.

Gjykata Administrative e Shkalles se Parë Tiranë me vendimin datë 04.04.2014, në veprimet përgatitore, ka vendosur të ngrejë mosmarrëveshjen për kompetencën lëndore para Gjykatës së Lartë lidhur me këtë çështje, duke vlerësuar se kompetenca lëndore i përket gjykatës civile dhe jo administrative. Kështu duke analizuar kërkimet objekt padie, kuadrin ligjor në të cilën mbështetet kërkimi, palët në mosmarrëveshje dhe vendimin unifikues nr.4, datë 10.12.2013 “kur nga objekti dhe shkaku ligjor i padisë mosmarrëveshja objekt gjykimi rezulton të jetë e natyrës civile dhe si rezultat i zgjidhjes së pasojave të çështjes me natyrë civile mund të urdhërohet kryerja e disa veprimeve administrative, si p.sh. urdhërimi i ZVRPP për kryer fshirjen apo regjistrimin e një prone të caktuar, atëherë shqyrtimi i këtyre çështjeve do të jetë në kompetencën e gjykatës që shqyrton mosmarrëveshjet civile.

Kolegji Administrativ i Gjykatës se Larte pasi analizoi aktet qe ndodhen ne dosje ,si dhe vendimeve te gjykatave, vlerëson se vendimi nr.16, datë 21.01.2014 të Gjykatës së Rrethit Gjyqësor Kruje është marrë në zbatim të gabuar të ligjit dhe për pasoje duhet prishur dhe çështja të dërgohet për vazhdimin e gjykimit pranë asaj gjykate për shkaqet e mëposhtme:

Çështja objekt shqyrtimi është në kompetencën lëndore të Gjykatës se Rrethit Gjyqësor Kruje pasi mosmarrëveshja është e natyrës civile. Në bazë të vendimit nr.4, datë 10.12.2013 të Kolegjeve te Bashkuara te Gjykatës se Lartë paragrafi 46, pika “C” parashikohet se “Kur nga objekti dhe shkaku ligjor i padisë mosmarrëveshja objekt gjykimi rezulton të jetë e natyrës civile dhe si rezultat i zgjidhjes së pasojave të çështjes me natyrë civile mund te urdhërohet kryerja e disa veprimeve administrative, si p.sh. urdherimi i ZRPP për kryer fshirjen apo regjistrimin një prone të caktuar, atëherë shqyrtimi i këtyre çështjeve do te jete ne kompetence të gjykatës që shqyrton mosmarrëveshjen civile”. Ndërsa në vendimin unifikues nr.3, datë 28.04.2014 të Kolegjeve te Bashkuara ne paragrafin 45, pika “ii” kanë konkluduar se “Çështjet të cilat në objektin e tyre kanë disa kërkime si të natyrës civile dhe administrative, kërkime të cilat janë paraqitur përpara datës 04/11/2013, do të vazhdojnë te gjykohen nga gjykata ku ato janë paraqitur.”

Nga aktet e dosjes rezulton se, objekti dhe shkaku i mosmarrëveshjes objekt gjykimi rezulton të jenë të natyrës civile dhe si rezultat i zgjidhjes se pasojave të çështjes civile mund të urdhërohet kryerja e disa veprimeve administrative si fshirja dhe regjistrimi i një prone të caktuar, atëherë kjo çështje do të jetë në kompetencën te gjykatës se shqyrton mosmarrëveshjet civile. Gjithashtu rezulton se çështja ne gjykim e cila ka dy kërkime si të natyrës civile dhe administrative, kërkime të cilat janë paraqitur me datë 20.05.2013, përpara datës 04.11.2013 atëherë kjo çështje do te gjykohet nga gjykata ku janë paraqitur, gjykata e Rrethit Gjyqësor Krujë.

Për sa sipër Kolegji Administrativ i Gjykatës se Lartë çmon se vendimi nr.16, datë 21.01.2014 të Gjykatës së Rrethit Gjyqësor Kruje duhet të prishet dhe dërgimin e çështjes po asaj gjykate për vazhdimin e gjykimit.

PËR KËTO ARSYE

Kolegji Administrativ i Gjykatës se Lartë, në bazë te nenit 63 te Ligjit nr.49, date 03.05.2012 “ Për Organizimin dhe Funksionimin e Gjykatave Administrative dhe Gjykimin e Mosmarrëveshjeve Administrative”

V E N D O S I

Prishjen e vendimit nr.16, datë 21.01.2014 të Gjykatës së Rrethit Gjyqësor Krujë dhe dërgimin e çështjes po asaj gjykate për vazhdimin e gjykimit.

Tiranë, më 16.10.2014

Nr.31003-03353-00-2014 i Regj. Themeltar

Nr.00-2014-3271 i Vendimit