Навоий давлат кончилик институти корхона жиҳозлари

4.11 Иссиқлик алмаштиргичларнинг бошқа турлари


4.II.1. “Труба ичида труба” иссиқлик алмаштиргич
Бу ускуна устма –уст ўрнатилган бир нечта иссиқлик алмаштириш элементларидан иборат (1.3-расм). Ҳар бир элементнинг ўзи эса ташқи (кожух) ва ички (иссиқлик алмаштирадиган) трубалардан ташкил топган. Иссиқлик алмашиниш ички трубаларнинг деворлари орқали амалга оширилади. Элементларнинг ички ва ташқи трубалари ўзаро боғланган бўлади. “Труба ичида труба” иссиқлик алмаштиргичлари кожух трубали иссиқлик алмаштиргичларга қараганда қўпол ва уларга кўп металл сарфланади. Шунинг учун улар асосан юқори босим остида совитиш ва иситиш жараёнларини амалга ошириш учун ишлатилади.
4.II.2. Суғориладиган иссиқлик алмаштиргичлар
Бу ускуналар устма-уст ўрнатилган ва ўзаро боғлиқ трубалардан иборат (1.4-расм). Трубаларнинг ташқи томонидан юқоридан қўйиладиган совитувчи сув оқиб тушади. Сувнинг қўйилишини яхшилаш учун трубаларнинг устида суғориш қурилмаси ўрнатилади. Агар трубаларнинг сони кўп бўлса суғориш қурилмаси уларнинг орасида ҳам ўрнатилиши мумкин. Иссиқлик алмаштиргичнинг остида оқиб тушаётган сувни йиғиб олиш учун идиш жойлаштирилган. Бундай иссиқлик алмаштиргичлар одатда кимёвий агрессив муҳитларни совитиш учун қўлланилади. Уларнинг самарадорлиги кичик, лекин ясалиши ва таъмирланиши осон.
4.II.3. Урама трубали (змеевикли) иссиклик алмаштиргичлар
Бундай ускуналар трубалар урамининг жойлашувига кура икки хил булади: трубалар урами идишнинг ичида ва идишнинг ташқарисида жойлаштирилган. Трубалар урами идиш ичида бўлган иссиқлик алмаштиргичлар кўпроқ қўлланилади. Бу ускуналар идиш ичидаги суюқликка ботирилган теки секи цилиндр урамаларидан иборат. Иккинчи муҳит (босими катта бўлгани) трубаларнинг ичидан ҳаракатланади. Урама трубали иссиқлик алмаштиргичларнинг гидравлик қаршилиги кичик ва температура кучланишларини уларнинг ўзи компенсациялайди. Лекин уларни ясаш ва йиғиш қийин.
4.II.4. Блокли иссиқлик алмаштиргичлар
Бундай ускуналар сунъий графит ёки графитопластдан тайёрланадиган иссиқлик ташувчилар ўтадиган вертикал ва горизонтал каналлари бўлган прессланган блоклардан ташкил топган. Блоклар бир –бири билан махсус ёпишқоқ қоришма ёрдамида уланади. Графитнинг иссиқлик ўтказувчанлиги катта ва агрессив муҳит таъсирига чидамлиги бўлганлиги блокли иссиқлик алмаштиргичларнинг афзаллиги ҳисобланади. Лекин бундай ускуналарнинг механик мустаҳкамлиги кичик ҳамда унинг деталларини фақатгина сунъий смоллари ёрдамида елимлаб бирлаштириш мумкин.