Namangan davlat universiteti fizika matematika fakulteti fizika kafedrasi

Ferrodinamik mexanizmli elektr o’lchash asboblarining tuzilishi va ishlash printsipi. Elektrodinamik mexanizmli asboblarning tashqi magnit maydon ta’siriga berilishini va aylantiruvchi momentining nisbatan kichik bo’lishini mexanizmda elektrotexnik po’lat plastinkalardan yoki permalloydan iborat ferromgnitli magnit o’tkazgichni qo’llash bilan bartaraf etish mumkin. SHunday magnit o’tkazgichli elektrodinamik asboblari ferrodinamik asboblar deb ataladi. Ularning ishlash printsipi elektrodinamik asboblarnikiga o’xshashdir. Qo’zg’almas g’altak 1 magnit o’tkazgich 3 ichiga joylashtiriladi, qo’zg’aluvchan karkassiz g’altak 2 esa po’lat 4 dan iborat qo’zg’almas tsilindr bilan o’rab olingan bo’ladi (6.14rasm). Po’lat magnit o’tkazgich o’lchash mexanizmining magnit maydonini kuchaytiradi, natijada asbobning aylantiruvchi momenti birmuncha oshadi. O’zida kuchli magnit maydonining bo’lishi tashqi magnit maydonlar ta’sirini kamaytiradi.

Ferrodinamik mexanizmli asboblar o’zi yozar asboblarda hamda tebranish, silkinish va zarbli silkinish sharoitlarida ishlatish uchun mo’ljallangan asboblarda qo’llaniladi. O’zi yozar (qayd qilish) asboblarida strelka harakatlanayotgan qog’oz lentasida o’zining ko’rsatishlarini (ma’lumotlarini) qayd qilish uchun siyohli pero bilan ta’minlangan bo’ladi. Havo kemalarida esa tashqi maydon va vibratsiya kuchli bo’lganligi uchun faqat ferrodinamik asboblar qo’llaniladi.

Ferrodinamik mexanizmli elektr o’lchash asboblarining afzallik va kamchilik tomonlari. Ulash mexanizmida chiziqli bo’lmagan element (po’lat magnit o’tkazgich) ning bo’lishi, gisterizis, uyurma toklar va po’latning magnitlanish egri chizig’i chiziqli bo’lmasligi sababli asbobning aniqlik sinfi pasayadi. Ferrodinamik mexanizmli asboblarning aniqlik sinflari 1,5; 2,5 bo’ladi.Ferrodinamik asboblarning tuzilishi mustahkam va ishonchlidir, ular deyarli tashqi magnit maydoni ta’sirini sezmaydi.