Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
47
7 
Qish oladan, yoz moladan, deydilar. Bu demak — qishda yer suvlasang ola qoldirma, ko‘klamda 
yer haydasang bemola qoldirma, demakdir. 
Boisi — ko‘klami shudgordan keyin yer oralari havol-havol bo‘lib qoladi. Ana shu havollardan 
shamol kiradi-kiradi — yer nami qochib qoladi. Yer namini saqlab qolish uchun esa shudgorni 
boronalash lozim bo‘ladi. 
Men shudgorni boronaladim. 
Dalalarim kaftday-kaftday bo‘ldi. Dalalarim moyak qo‘ysa ko‘rinar bo‘ldi. 
Ammo bir boronani o‘zi kifoya etmaydi. Endi molalash lozim bo‘ladi. Mola yer namini ost 
qabatidan ust qabatiga ko‘tarib beradi. Mola yer yuza kesaklarni maydalab-maydalab beradi. 
Men endi dalalarimni molaladim. 
Dalalarim sumalakday-sumalakday bo‘ldi. 
Jo‘ya olib ekilmish g‘o‘za o‘n-o‘n besh kun oldin yetiladi. Jo‘ya olib ekilmish g‘o‘za o‘n-o‘n besh 
kun oldin ochiladi. Jo‘yada unib chiqmish g‘o‘za oftob taftini tez oladi. 
Shu bois, traktor bilan jo‘ya oldim. 
Dalalarim kokilday-kokilday bo‘ldi. 
 
8
Chin, dalalarim qishi bilan qor suv ichdi. Chin, dalalarim qishi bilan yomg‘ir suv ichdi. 
Ammo suv bilan suv bor-da. Masalan, hovuz suv g‘ozsiz suv bo‘ladi. Odam hovuz suvdan ichsa — 
suv ichganday bo‘lmaydi. 
Odam oqar suvdan ichsa — badani jimir-jimir etadi. Badani yayraydi! 
Oqar suvdan miya to‘ladi. Oqar suvdan miya ravshan tortadi. 
Oqar suvda jon bor-da! 
Shu bois, dalalarimga yaxob suv berdim. 
Jo‘yalardan jildiratib-jildiratib yaxob suv oqizdim.
Dalalarim bir hafta yaxob suvladi. Dalalarim bir hafta zaxlab suvladi. 
Ana endi dalalarim donador-donador bo‘ladi. 
Ana endi dalalarim serkesak-serkesak bo‘ladi. Donador dala namdor dala bo‘ladi. Suv ana shu 
donalar oralab yer singadi. Havo ana shu donalar oralab o‘tadi. 
 
9 
Dala ko‘ngli nozik bo‘ladi — vaqt-bevaqt oralay bersa ko‘ngliga oladi. 
Dala fe’li injiq bo‘ladi — bot-bot traktor sola bersa aynib qoladi. 
Dala tepkilanib qoladi. Dala zichlanib qoladi. Dala tosh-metin bo‘lib qoladi. 
Daladan tirik mavjudotlar qochadi. Qocholmay qolmish mavjudotlar o‘lib-o‘lib qoladi. 
Oqibat — g‘o‘za emin-erkin ildiz otmaydi. G‘o‘za orom-orom o‘smaydi. 
Men dalalarimdan oyog‘imni tortdim.