Microsoft Word togaymurod otamdan qolgan dalalar lotin ziyouz com doc

 
2
Uyimizda nimamizdir yo‘qday bo‘ldi, uyimizda nimamizdir kamday bo‘ldi.
Bola-baqralarimni qaradim, — bari omon-eson bo‘ldi. 
Mol-hollarimni sanadim — bari tugal bo‘ldi. 
Tovuqlarimni sanadim — tovuqlarim-da tugal bo‘ldi. 
Unda kimim yo‘q bo‘ldi, unda nimam yo‘q bo‘ldi? 
Men o‘ylab-o‘ylab topdim — ayvonimiz shipida hayot qechiruvchi qaldirg‘ochlarimiz yo‘q bo‘ldi. 
Qaldirg‘ochlarimiz qayoqqa ketmish bo‘ldi? 
Qayoqqa bo‘lardi — Afg‘onistonga-da. Amudaryo o‘ng beti Afg‘oniston-da. Iliq yurt oti bo‘ladi 
— qaldirg‘ochlar yurti bo‘ladi-da. 
Qaldirg‘ochlar afg‘on yurtga safarlabdi — kuz oxirlabdi-da. 
 
3 
Bir dalam yuzi oppoq-oppoq bo‘ldi. Bu ne bo‘ldi? Erta tushmish qor bo‘ldimi yo qirov bo‘ldimi? 
Bir vaqtlar ana shu dalam g‘uj-g‘uj qamishzor edi. Qirg‘ovulzor edi. 
Denovdan besh-olti qur keldi. Qurlar ana shu qamishzorni tep-tekisladi. Pol-polladi. Sholipoya 
etdi. 
Qamishzorda shundayam sholi bo‘lmoqlik qildi, shundayam sholi bo‘lmoqlik qildi-e! Qurlar o‘z 
sholisini o‘zi tashib ololmay qoldi! 
Shunda qurlar bizga-da bir xaltaday guruch berdi. 
Ana shunda qozonimiz guruch ko‘rganday bo‘ldi! Ana shunda qornimiz palov yeganday bo‘ldi! 
Ammo... kattalar qurlarni ko‘p ko‘rdi. 
— O‘zbekiston Quriya emas! — deya do‘qladi. 
Shu-shu — qurlar qorasini qaytib ko‘rsatmadi. 
Sholipoya paxtazor bo‘ldi. 
Men mazkur dalamni suvlab edim — yer usti suvni yer ostiga qarab singdi-singdi — yer osti suvi 
bilan qo‘shildi. Shunda, yer osti suvi tuproq qil-qil nozik yo‘llaridan yer betilab keldi. Yer osti suvi yer 
betida bug‘landi-bug‘landi — havolab uchib-uchib yo‘qoldi. 
Yer betida ana shu oppoq-oppoq tuzlar qoldi. 
Men ushbu dalamni uchta polladim. Pollarni tizza bo‘y-tizza bo‘y marzaladim. Marzalarni bel yuzi 
bilan tars-tars urib zichladim. 
Pollarni aylantirib ariq qazidim. Ariq endi bir ketmon enicha bo‘ldi. Ariq chuqurligi tizza bo‘yicha 
bo‘ldi. 
Uchta polni-da labolab-labolab suvladim. Ko‘llatib-ko‘llatib suvladim. 

---

Tog‘ay Murod. Otamdan qolgan dalalar (roman)