Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
30
Oy-kuni bo‘lmasa-da, onamizni egatda dard tutadi. 
Onamiz egatda ichlarini ushlab-ushlab voy-voylaydi. 
«Erkaklar bilan teng huquqli bo‘lmay men o‘layin-a! — deydi. — Sharqda mash’al bo‘lmay men 
o‘layin-a!» 
Oppoq dalani chala chaqaloq ovozi oladi... 
Fizika ko‘z-ko‘z etib paxta teradi. 
— Ana, ana! — deydi. —Ko‘rayapsanmi? G‘o‘zani ushlab turma — g‘o‘za qochib ketmaydi. Ikki 
qo‘ling ham chanoqda bo‘lsin. 
Men Fizika aytmishdayin teraman. 
9 
Kimyo qiytiqda kaft karnay etadi. 
— Tushlik! — deya ovoz beradi. 
Etagim to‘lar-to‘lmas bo‘ladi. Tepkilay-tepkilay tarozi orqalab boraman. 
— Uch kilo! — deydi tarozibon. Bolalar gurr kuladi. Qiytiqda etak to‘shayman. 
To‘shagim-da etagim bo‘ladi, dasturxonim-da etagim bo‘ladi. 
Non bilan choy tushligim bo‘ladi. Tushdan keyin ikki kilo teraman. 
10 
Yetarda yo‘qlama bo‘ladi. 
Direktorimiz ko‘p teruvchilarni bir saflab ulug‘laydi. 
— Mash’allarni ko‘ring — havas qiling! — deydi. Oz teruvchilarni bir saflab mazzallatlaydi. 
— Qoloqlardan hazar qiling, hazar! — deydi. Direktorimiz sho‘ro paxtasidan nimalar olinishini 
barmoqlab-barmoqlab sanab beradi: 
— Bir tonna sovet paxtasidan ikki ming to‘rt yuz yigirma metr gazlama, sakson olti kilo moy, ikki 
yuz yigirma olti kilo kunjara, o‘n besh kilo kir sovun... olinadi! Shu sababdan ham sovet paxtasi «oq 
oltin» deyiladi! Sovet «oq oltin»ini termaslik — jinoyat! 
Tikka tura berib, oyoqlarim zirq-zirq toladi. 
O‘zimni bir o‘ng oyog‘imga tashlayman, bir chap
 
oyog‘imga tashlayman. 
— Ertaga tayin bajaraman, — deya qutulaman. 
 
11 
Ertasi Fizika o‘rgatmishdayin teraman. Jon-jahdim bilan teraman. 
O‘n kilo teraman— o‘n kilo! Yotarda tag‘in tikka turaman. 
— O‘rtoqlar, men bugun byuroda bo‘ldym! — deydi direktorimiz. — Shaxsan o‘rtoq Mavlonov 
oldida bo‘ldim! O‘rtoq Mavlonov mash’allarga ofarinlar aytdi! 
Direktorimiz qulog‘imdan cho‘zadi. 
— Sen atalalarni esa jazolansin, dedi, ha, jazolansin, dedi! — deydi. Jazolayman, ha, jazolayman! 
Buni paxta fronti deb qo‘yibdi! Paxta fronti javobgarlikka tortadi! Paxta fronti qamatadi! 
Tikka tura berib, uyqularim kelib ketadi. 
— Ertaminan g‘ayrat qilaman, — deya so‘z beraman.