Microsoft Word togaymurod otamdan qolgan dalalar lotin ziyouz com doc

 
3
Eshik tushdan keyin ochiladi. 
Direktorimiz jug‘rofiya tayog‘ini eshikka nish etadi. 
— O‘rtoqlar, birov-birovdan olg‘a! — deydi. Men bo‘xchamni orqalab tashqarilayman. 
Maktabimiz darvbzasi oldida to‘rtta katta mashina bo‘ladi. 
Muallimlarimiz maktabdan mashinagachayin ikki saf bo‘lib turadi. 
Men ana shu saf orasidan mashina yo‘l olaman. 
Katta sinflar bo‘xchalarini mashina ichiga otib-otib tushiradi. 
Men-da, bo‘xchamni otaman — bo‘xcham yelkamga qaytib kelib tushadi. Tag‘in otaman — 
bo‘xcham ko‘ksimga qaytib kelib tushadi. 
Fizika muallimimiz bo‘xchamni mashina ortib beradi. Oyog‘imdan oladi-da, o‘zimni-da ortadi. 
Jo‘na-jo‘na bo‘ladi. Ota-onalarimiz bot-bot tayinlab qoladi: 
— Ariqdan suv ichma — paxtaga dori sepadi! 
— Samolyot dori sepa bersa — bekinib ol! 
— Qiynalsang — qochib kela ber! 
— Mabodo qochaman desang — katta yo‘l chetginasidan yurgin! 
Mashina ohista-ohista jiladi. Ota-onalarimiz qo‘l silkib-qo‘l silkib qoladi. Birov ko‘ziga yosh oladi. 
Birov yupatadi: 
— Bo‘ldi-e, bolangiz frontga ketayaptimi! 
— O‘z oti o‘zi bilan paxta fronti-da! 
— Jobida bir mashina yordamchi bola soyga ag‘nab ketibdi! 
— Bolalar kori hol bo‘lmabdimi? 
— Eb-ey, bola qolibdimi!.. 
Yo‘lda bolalar qo‘shiq aytadi. Kim qandaychikin qo‘shiq biladi — ana shu qo‘shiqni aytadi. 
Shunda, mashina yo‘l chetlab oyoq iladi. 
Direktorimiz kabinadan tashqarilaydi. Kabina pillapoyasida tikka bo‘ladi. 
— O‘rtoqlar, o‘lan-laparlar aytmanglar! — deydi. — Partiya-sovet qo‘shiqlaridan aytinglar! 
 
4
Mashina yuradi-yuradi — Stalin kolxozi maktabi oldida oyoq iladi. 
Men bo‘xchamni gursillatib yer tashlayman. Bo‘xcham ketidan o‘zim osilib tushaman. 
Maktab qorovuli huvillab yotmish sinfxonalarni ochib-ochib beradi. 
Men bo‘xchamni orqalab ichkari lo‘killayman. 
Katta sinf sinfxona to‘rini oladi. 
Mayda sinf ostona oldida qoladi. 
Men deraza ostini olaman. Bo‘xchamni gupillatib tashlayman-da — ustiga uzala tushib 
yotibolaman. 

---

Tog‘ay Murod. Otamdan qolgan dalalar (roman)