Microsoft Word marsga hujum ziyouz com doc

“Jahon adabiyoti” jurnalidan 
 
 
Rey BREDBERI 
 
 
MARSGA HUJUM 
 
Roman 
 
“Hayratga tushish qobiliyati buyuk ishdir,  
— dedi faylasuf. — Kosmik parvozlar  
bizlarni yana bolalarga aylantirib qo‘ydi”. 
 
 
Yanvar 1999 
 
Raketa yozi 
 
Hozirgina Ogayo qishi hukmron edi: eshik va derazalar taqa-taq yopilgan, oynalarni qalin qirov 
bosgan; tomlarning qirralaridan nayzasimon sumalaklar osilib turar, bolalar tepaliklardan chang‘ilarda 
o‘qdek uchar, qora ayiq mo‘ynasidan tikilgan po‘stinli ayollar sirpanchiq ko‘chalarda kezinar edilar. 
To‘satdan issiq havo to‘lqini shahar bo‘ylab yoyildi, xuddi tasodifan ochiq qolgan novvoyxona 
eshigidan chiqqan hovur singari hammayoqni issiq havo qopladi. Uylardan shovullab suvlar oqdi. 
Butalar va bolalarning egnilari ho‘l bo‘ldi. Tomlardan sumalaklar uzilib tushar, yerga tushib mayda-
mayda bo‘lar va erib ketar edi. Eshiklar lang ochildi. Osmonda bulutning choki so‘kildi. Bolalar 
egnilaridan sviterlarini yechib otdilar. Onajonlar ham ayiq mo‘yna po‘stinlarini yelkalaridan tashladilar. 

---

Marsga hujum (roman). Rey Bredberi 
 
 
www.ziyouz.com kutubxonasi 
2
Qor erib, o‘tloqzorda bulturgi maysalar mung‘ayib ko‘rindi. 
Raketa yozi. Og‘izdan-og‘izga, uydan-uyga shu ikki so‘z ko‘chib yurar edi: Raketa yozi. Xuddi cho‘l 
nafasidek qaynoq havo derazalardagi muz naqshlarni eritib yubordi, ular o‘rnida nafis kashtalar suzilib 
ko‘rindi. Chang‘i va konkilar birdan kerak bo‘lmay qoldi. Ayozli osmondan tepalik ustiga qo‘nayotgan 
qor yergacha kelmay, havodayoq qaynoq yomg‘irga aylanmoqda edi. 
Raketa yozi. Odamlar yomg‘ir tomchilari pitraday to‘kilayotgan ayvondan boshlarini chiqarib, qizara 
boshlagan osmonga qarar edilar. 
Pushtirang olov va cho‘g‘dek hovur ufurib turgan kosmodromda raketa qaddini g‘oz tutib turar edi. 
Ayozli qish tongida raketa o‘zining qudratli otash nafasi bilan atrofni yoz qilib yuborayotgandi. Raketa 
ob-havo yaratmoqda va bir necha lahzadan buyon chor atrofda yoz hukm surmoqda edi...