Мактаб раҳбарларининг молиявий ва ҳуқуқий саводхонлиги

Ишга қабул қилишни расмийлаштириш тартиби.
Ишга қабул қилишни расмийлаштиришда ишга кираётган ходим қуйидаги ҳужжатларни тақдим этади:
паспорт ёки унинг ўрнини босувчи ҳужжат, ўн олти ёшгача бўлган шахслар эса - туғилганлик ҳақидаги гувоҳнома ва турар жойидан маълумотнома. Таълим муассасаси жойлашган ҳудудда доимий рўйхатдан ўтмаган шахслар мазкур таълим муассасасида ишлашга даъвогарлик қила олмайдилар. Вақтинчалик рўйхатдан ўтган шасхлар вақтинчалик рўйхатдан ўтиш амалда бўлган даврда ишга қабул қилинишлари мумкин;
меҳнат дафтарчаси, биринчи маротаба ишга кираётган шахслар бундан мустасно. Ўриндошлик асосида ишга кираётган шахслар меҳнат дафтарчаси ўрнига асосий иш жойидан маълумотнома тақдим этадилар;
ҳарбий хизматга мажбур ёки чақирилувчилар тегишлича ҳарбий билет ёки ҳарбий ҳисобда турганлик тўғрисидаги гувоҳнома;
олий ёки ўрта махсус ўқув юртини тамомлаганлиги тўғрисидаги диплом, зарур бўлганда қўшимча равишда қайта тайёрлаш курсларидан ўтганлик тўғрисидаги, диплом нострификация қилинганлиги тўғрисидаги сертификат, Меҳнат ва аҳолини ижтимоий ҳимоя қилиш вазирлигининг 30.12.2005 йилдаги 105-сонли, Халқ таълими вазирлигининг 42-сонли ҳамда Ўзбекистон Республикаси Вазирлар Маҳкамаси ҳузуридаги Давлат тест марказининг 01-357-сонли қарорлари билан тасдиқланган, Адлия вазирлиги томонидан 18.01.2006 йилда 1541-рақам билан рўйхатга олинган халқ таълими ходимлари асосий лавозимларининг малака тавсифларига биноан қўйиладиган талабларни бажариш учун ўқитувчи, тўгарак раҳбари, катта етакчи ва шу сингари ишларни бажариш ҳуқуқини берадиган бошқа ҳужжат ва гувоҳномалар.
Ишга қабул қилиш вақтида ишга кираётган шахсдан қонун ҳужжатларида назарда тутилмаган ҳужжатларни талаб қилиш тақиқланади.
Масалан, баъзи таълим муассасалари раҳбарлари ишга кираётган шахсдан турар жойидан маълумотнома талаб қиладиларки, бунга зарурият йўқ, негаки, ишга кирувчи доимий рўйхатдан ўтганлиги тўғрисидаги маълумотлар қайд қилинган, яъни яшаш жойи кўрсатилган паспорт ксеронусхасини тақдим этишади.
Бошқа зарур ҳужжатлар:
1. Жамғариб бориладиган пенсия жамғармаси дафтарчаси.
2. Болаларининг туғилганлик тўғрисидаги гувоҳномаси.
3. Ҳайдовчилар учун: ҳайдовчилик гувоҳномаси, огоҳлантириш талони, 083/h шаклдаги тиббий маълумотнома.
4. Жорий йилда меҳнат фаолияти билан шуғулланган бўлса, жорий йил бошидан олган даромадлари ва ушлаб қолинган даромад солиғи миқдори тўғрисидаги маълумотнома.
Ишга кирган ходим билан қуйидагилар қабул қилинади ва расмийлаштирилади:
1. Шахсий дело.
2. Паспорт нусхаси.
3. Диплом нусхаси.
4. Таржимаи ҳол.
5. Ариза.
6. Меҳнат шартномаси.
7. Ишга қабул қилиш тўғрисидаги буйруқ.
8. Меҳнат дафтарчасига қайд этиш.
9. Шахсий варақа ва Т-2 шахсий карточкаси.
10. Иш ҳақи бўйича шахсий ҳисобварағи.
Таълим муассасаси раҳбари ўтказилган суҳбат натижаларига кўра иш юритувчи вазифасини бажарувчи ходимга тегишли ҳужжатларни расмийлаштириш бўйича кўрсатма беради.
Ишга кираётган ходим ариза ёзади.