Личинка хордалилар (Urochordata) ¸ки šобиšлилар (Tunicata) кенжа типи

Dumsizlar (Ecaudata yoki Anura) turkumi. Dumsizlar turkumiga birmuncha murakkab tuzilgan, keng tarqalgan va turlari ko`p bo`lgan amfibiyalar kiradi (2100 dan ortiq turi bor). Ayrim adabiyotlarda 3500 - 4000 taga yaqin turi bor deyilgan. MDHda 23 ta turi uchraydi. Ular Antarktidadan tashqari barcha qit`alarda tarqalgan. Dumsizlar ayniqsa Janubiy Amerikada ko`plab uchraydi. Turlari ko`p bo`lishi bilan bir qatorda ularning hammasi bir xilda baqaga o`xshash shaklda tuzilgan bo`lib, gavdasi kalta va keng bo`ladi. Serbar boshi tanasiga qo`shilib ketgan. Ularda har doim oldingi va keyingi oyoqlari yaxshi taraqqiy etgan. Keyingi oyoqlari oldingilariga nisbatan 2-3 marta uzun bo`ladi. Orqa oyoqlarining uzunligi sababli ular sakrab-sakrab harakat qiladi. Umurtqalari protsel tipda (oldi botiq, orqasi qavariq) bo`ladi. Umurtqa pog’anasining dum bo`limi bitta uzun suyakcha (urostie) ko`rinishida bo`ladi. Ko`pchilik turlarida qovurg’alari bo`lmaydi. Ularning peshona va tepa suyaklari qo`shilib, juft peshona-tepa suyagini hosil qilgan. Dumsizlarda, shuningdek, bilak va tirsak suyaklari hamda katta va kichik boldir suyaklari ham qo`shilib ketgan. Kaft va kaftoldi suyaklari esa qisman qo`shilib o`sgan bo`ladi. Buning sababi ularning qattiq substratda sakrab-sakrab harakatlanishi bo`lsa kerak. Nog’ora bo`shlig’i rivojlangan. Voyaga yetgan turlarida tashqi jabralari va jabra yoriqlari bo`lmaydi. Urug’lanishi, asosan tashqi, kopulyativ organlari yo`q.
Ko`p turlarni o`z ichiga olgan dumsiz amfibiyalar turkumi 5 ta kichik turkumga va 19 ta oilalarga bo`linadi (102-rasm).
Dumsizlar turkumining kenja turkumlari nomlari tana bo`limidagi umurtqalarining qay shaklda bo`lishidan olingan.
1. Amfiselalar (Amphicoela) kenja turkumi vakillari dumsizlar turkumi orasida eng primitivi bo`lib, umurtqalari amfisel tipda tuzilgan, uncha uzun bo`lmagan qovurg’alari bor va dum muskullarining rudimenti saqlangan. Bu kenja turkumga bitta silliqoyoqlilar (Leopelmidae) oilasi kiradi. Silliqoyoqlilar oilasiga 4 ta tur kiradi, shulardan 3 tasi Yangi Zelandiyada va 1 tasi Shimoliy Amerikada tarqalgan. Ularning erkaklari bir umrga dumini saqlab qolgan. Yangi Zelandiyada uchraydigan turining dum bo`limi skeleti umurtqalari segmentlashgan. Hayotining ko`p qismini, asosan suvda o`tkazadi.